नेपालमा थप भए २ दर्जन ओमिक्राेन संक्रमित

नेपालमा थप २४ जनामा कोरोनाको नयाँ भेरियन्ट ओमिक्रोनको संक्रमण पुष्टि भएको छ । पुसमा संकलित १ हजार १४६ पोजिटिभ नमूनाहरुको एस जिन स्क्रिनिंग गर्दा २ सय ५० वटा (२२ प्रतिशत) एस जिन नेगेटिभ पत्ता लागेको थियो ।

एस जिन नेगेटिभ पत्ता लागेका मध्ये २४ नमूनाहरुको जिन सिक्वेन्सिङ गर्दा सबै नमूनाहरुमा ओमिक्रोन भेरियन्ट पुष्टि भएको स्वास्थ्य मन्त्रालयले जनाएको छ । मंसिर २० गते एक जना विदेशी नागरिक र उनको सम्पर्कमा आएका अर्का व्यक्तिमा ओमिक्रोन पुष्टि भएको थियो ।

त्यसपछि पुस ७ गते एक जनामा ओमिक्रोन पुष्टि भएको थियो । योसँगै नेपालमा २७ जनामा ओमिक्रोन भेरिएन्ट पुष्टि भएको छ । ओमिक्रोन भेरियन्टको संक्रमणबाट बिरामीहरुको चाप बढ्न सक्ने भएकाले सबै अस्पतालहरुलाई तयारी अवस्थामा रहन मन्त्रालयले निर्देशन दिएको छ ।