लालझाडिमा अध्यक्ष कप फुटवल आज देखि हुने

महेन्द्रनगर

२०८१ माघ १६ गते बुधबार

कञ्चनपुरको लाल झाडीमा तेस्रो संस्करणको लालझाडी अध्यक्ष कप फुटबल प्रतियोगिता आज उद्घाटन गर्ने तयारी भइरहेको छ । लालझाडी गाउँ खेलकुद समितिको आयोजनामा तेस्रो अध्यक्ष कप फुटबल प्रतियोगिता २०८१ हुन गइरहेको छ । इटाहा चारपाते युवा क्लब देखतभुलीको खेलमैदानमा आजदेखि प्रतियोगिता सुरु हुने आयोजकले बताएको छ । लालझाडी गाउँपालिका अध्यक्ष निर्मल रानाको प्रमुख आतिथ्यतामा उद्घाटन हुने समितिका सदस्य सचिव हेमन्त रानाले बताए । मंगलबार खेल तालिका सार्वजनिक गरिएको थियो । प्रतियोगितामा युवा र भेट्रानको अलगअलग खेल तालिका सार्वजनिक गरिएको छ ।
युवा तर्फ २० टिमको सहभागिता रहेको छ भने भेट्रान तर्फ ८ टिम रहेका छन् । नकआउट आधारमा खेलाइने उक्त प्रतियोगिताका खेल आज एक कार्यक्रमका साथ मध्याह्न १२ बजे उद्घाटन गर्ने कार्य तालिका रहेको आयोजक लालझाडी गाउँ खेलकुद समितिका अध्यक्ष प्रकाश रानाले बताएका छन् । उनका अनुसार, प्रतियोगिताको उद्घाटन खेल लालझाडी -२ कञ्ज र न्यु प्रगतिशील युवा क्लब बिच दिउँसो १ बजे प्रतिस्पर्धा हुने छ । लालझाडी गाउँपालिका मुख्य प्रवर्द्धक, लालझाडी गाउँपालिका वडा नं. ५ को वडा कार्यालय र इटाहा चारपाते युवा क्लबको समेत प्रतियोगितामा समन्वय तथा सहयोग रहेको छ ।
तेस्रो संस्करणमा युवा तर्फ च्याम्पियन हुने टिमले नगद राशि १ लाख २१ हजार १ सय २१ रुपैयाँ सहित ट्रफी, प्रमाणपत्र र मेडल हात पार्ने छन् । उपविजेता टिमले भने ७१ हजार १ सय ७१ रुपैयाँ सहित ट्रफी, प्रमाणपत्र र मेडलमा चित्त बुझाउनु पर्ने छ । प्रतियोगिताका विभिन्न विधाका उत्कृष्ट खेलाडीलाई आकर्षक पुरस्कारको समेत घोषणा गरिएको छ । भेट्रान तर्फ प्रथमलाई रु. ११ हजार १ सय ११ सहित खसी, ट्रफी, प्रमाणपत्र र मेडल तथा उपविजेतालाई खसी, ट्रफी, प्रमाणपत्र र मेडलद्वारा पुरस्कृत गरिने बताइएको छ ।