काठमाडौं । नेपाली कांग्रेसका सभापति शेरबहादुर देउवाको गृहजिल्ला हो डडेल्धुरा । प्रधानमन्त्री समेत रहेका देउवाका सुदूरपश्चिम प्रदेशमा पार्टीभित्रका दुई विश्वासपात्र हुन् रमेश लेखक र एनपी सावद ।

देउवाले उनीहरूलाई पटक–पटक बन्त्री बन्ने अवसर पनि दिएका छन् । दुवै पार्टीका केन्द्रीय सदस्य हुन् । केन्द्रमा उनीहरू दुवैजना देउवाका विश्वासपात्र भए पनि जिल्लामा भने उनीहरू एकार्काका ‘दुस्मन’जस्तै छन् । दुवैले कञ्चनपुरबाट राजनीति गर्छन् । कञ्चनपुर क्षेत्र नम्बर–३ बाट रमेश लेखक र २ नम्बर क्षेत्रबाट एनपी सावद चुनाव लड्ने गरेका छन् ।

सावद देउवाकै जिल्ला डडेधुराका भए पनि कञ्चनपुरमा राजनीति गर्छन् भने बैतडीका लेखक कञ्चनपुर बसेर राजनीति गर्छन् । यो जिल्लामा पौडेल–कोइराला पक्ष सशक्त देखिएको छैन । त्यसैले देउवा पक्षकै बीचमा लेखक र सावदबीच प्रतिस्पर्धा छ ।

०७४ सालको संसदीय निर्वाचनमा सावद र लेखक दुवै पराजित भएका थिए । लेखक ४०० भन्दा कम मतान्तरले पराजित भएका थिए । त्यति बेला लेखकलाई हराउन सावद समूह नै सक्रिय रहेको आरोप लाग्दै आएको छ ।

कञ्चनपुर कांग्रेसका एक नेता भन्छन्, “उनीहरू दुवै एकार्कालाई देखि सहँदैनन् । दुस्मनजस्तै छन् । तल्लो तहसम्म उनीहरूको गुट कायम छ । यसले पार्टी र उनीहरू स्वयंमलाई हानि गरेको छ ।”

कांग्रेसका सबैजसो अधिवेशनमा सावद र लेखककै गुट प्रतिस्पर्धामा हुन्छ । नेपाली कांग्रेसको १४औँ महाधिवेशनअन्तर्गत भएको महाधिवेशन प्रतिनिधि र प्रदेश महाधिवेशन प्रतिनिधिमा पनि उनीहरूको प्यानल चुनावी मैदानमा थियो ।

चुनावमा एनपी सावद पक्ष बलियो बनेर आयो भने रमेश लेखकको समूह कमजोर देखिएको छ । गुटको अस्वस्थ प्रतिस्पर्धाको सिकार भएका छन् बहालवाला जिल्ला सभापति हरिप्रसाद बोहरा । लेखकनिकट मानिने बोहरा कञ्चनपुर क्षेत्र नम्बर–२ को केन्द्रीय महाधिवेशन प्रतिनिधिको चुनावमा नै पराजित भएका हुन् । अब उनको पुनः सभापतिमा लड्ने वा महाधिवेशनमा माथिल्ला तहको नेतृत्वमा उमेदवारी दिने बाटो बन्द भएको छ ।

गुटगत राजनीतिको सिकार भएका छन् जिल्ला कार्यसमितिका पूर्वसचिव भोजराज बोहरा पनि । उनी दुवै गुटमा थिएनन् । त्यसैले पार्टीभित्र मात्र नभएर पार्टीबाहिर पनि सम्मानित नेता बोहोरा गुटगत राजनीतिबाट पाखा लाग्न बाध्य भएका छन् ।

कञ्चनपुरमा संघका तीन निर्वाचन क्षेत्र र प्रदेशका ६ वटा क्षेत्र छन् । क्षेत्र नम्बर–३ मा केन्द्रीय महाधिवेशन प्रतिनिधि र प्रदेशमा रमेश लेखक बलियो देखिए भने अरू क्षेत्रमा सावदकै समूह बलियो देखिएको छ ।

निर्वाचन क्षेत्र नम्बर–३ का दुवै प्रदेशसभामा लेखकनिकट उमेदवारले जितेका छन् । क्षेत्र नम्बर–२ का दुवै प्रदेशसभामा सावदपक्षीय नेता विजयी भएका छन् । निर्वाचन क्षेत्र नम्बर–२ का दुवै प्रदेशसभामा सावद र दिवानसिंह विष्ट समूहका नेता निर्वाचित भए । सबै तहमा सावद र लेखकको समूह प्यानलै बनाएर चुनावी मैदानमा उत्रिएको थियो ।

यसअघि, कांग्रेसको वडा, नगर चुनावमा पनि लेखक र सावदको छुट्टाछुट्टै प्यानल बनेको थियो । जिल्ला अधिवेशनमा पनि दुवै नेताको प्यानल बन्ने देखिएको छ ।