सहकारि संस्थाकाे पदाधिकारि चुन्न निर्वाचन ।

२०७८ पुष ०३ गते शनिबार

बैतडी –बैतडीमा एक सहकारी संस्था सञ्चालक समितिका पदाधिकारी चयनका लागि मतदान भएको छ । सहमतिमा सञ्चालक समिति चयन हुन नसकेपछि अध्यक्ष र उपाध्यक्ष पदका लागि मतदान भएको हो ।

जिल्लाको दशरथचन्द नगरपालिका २ स्थित जनकालिका बचत तथा ऋण सहकारी संस्थाको नयाँ अध्यक्ष र उपाध्यक्षका लागि शनिबार मतदान भएको हो । अध्यक्ष पदका लागि खडकबहादुर बोहरा र प्रकाश बोहरा चुनावी प्रतिस्पर्धामा छन् । खडक नेकपा एमाले दशरथचन्द नगरपालिका वडा नं २ का वडा कमिटि अध्यक्ष हुन् भने प्रकाश बोहरा नेकपा माओवादी केन्द्रका दशरथचन्द नगरकमिटि उपाध्यक्ष हुन् ।

यस्तै उपाध्यक्ष पदका लागि बीरबहादुर बोहरा (सुवेदार) र बीरबहादुर बोहरा चुनावी मैदानमा छन् । बीरबहादुर बोहरा (सुवेदार) कांग्रेस निकट हुन् भने अर्का बीरबहादुर एमालेका वडा कमिटि सदस्य हुन् ।

सहकारी संस्थाको २४ औं साधारणसभाले सहमतिमा नेतृत्व चयन गर्न नसकेपछि आज मतदान भएको हो । आज सम्पन्न भएको मतदानमा ७७५ जना शेयर सदस्य मध्ये ५५२ जनाले मतदान गरेका छन् । अहिले मतगणना भईरहेको छ ।

सहकारी संस्थाको सचिवमा अर्जुनराम लावड, सहसचिवमा पुष्पा बोहरा, कोषाध्यक्षमा प्रेमसिंह बोहरा लगायत अन्य सदस्यहरु निर्विरोध निर्वाचित भएका छन् ।