२५ वर्षदेखि फरार कुख्यात अपराधी पक्राउ परेका छन्। दिल्ली–जयपुर राजमार्गमा ट्याक्सी चालकको हत्या गरी गाडी चोर्ने अनि नेपालमा बेच्ने गिरोहका दुई फरार सदस्यलाई प्रहरीले २५ वर्षपछि पक्राउ गरेको हो। 
इन्डियन एक्सप्रेसका अनुसार सन् १९९९ देखि २००१ सम्म सक्रिय यो चार सदस्यीय गिरोहले ट्याक्सी चालकको हत्या गरेर चोरीका गाडीहरू नेपालमा बेच्ने कार्य गर्दथ्यो। गिरोहका दुई सदस्य धीरेन्द्र तोमर र दिलीप नेगी सन् २००७ मा पक्राउ परेका थिए भने अन्य दुई सदस्य धीरज तोमर र अजय लाम्बा फरार थिए।  
यस वर्ष प्रहरीले गिरोहका सबै सदस्यलाई पक्राउ गर्न सफल भएको छ। पछिल्लो पटक धीरज तोमरलाई बिहीबार उत्तर प्रदेशको मुजफ्फरनगरबाट पक्राउ गरिएको छ। उनी २० वर्षदेखि नक्कली पहिचान ‘राज सिंह’ प्रयोग गरी लुकेर बसेको पाइएको छ। 
एक वरिष्ठ प्रहरी अधिकारीले भने, ‘गिरोहका सदस्यहरू ट्याक्सी स्ट्यान्डमा पुग्थे र चालकलाई निश्चित गन्तव्यमा लैजान भन्थे। बाटोमा उनीहरूले क्लोरोफर्म प्रयोग गरी चालकलाई बेहोस बनाउने, घाँटी थिचेर हत्या गर्ने र लासलाई उपत्यका वा नालीमा फालिदिन्थे। त्यसपछि चोरीका गाडीहरू नेपालमा बेच्थे।’
सन् २००७ मा दिल्लीको एक अदालतले धीरेन्द्र र दिलीपलाई दोषी ठहर गर्दै आजीवन कारावासको सजाय सुनाएको थियो। धीरज र अजयलाई फरार अपराधी घोषणा गरिएको थियो।  
यस वर्ष मे महिनामा धीरेन्द्रलाई बरेलीबाट पक्राउ गरिएको थियो। उनले सोधपुछमा ‘राज सिंह’ नै आफ्नो भाइ धीरज भएको स्वीकार गरेका थिए। जुलाई महिनामा अजय लाम्बालाई दिल्लीको पटियाला हाउस अदालत बाहिरबाट पक्राउ गरिएको थियो।  
प्रहरीले धीरजलाई पक्राउ गर्नका लागि उनको परिवारले लिने सेनाको पेन्सनको आधारमा निगरानी गरेको थियो। नोभेम्बर २५ मा पेन्सन झिक्न बैंक पुगेका धीरजलाई प्रहरीले पक्राउ गरेको हो।  
यो गिरोहमाथि उत्तराखण्डको हल्द्वानी, अल्मोडा र चम्पावतमा कम्तीमा चार ट्याक्सी चालकको हत्या गरेको आरोप छ। सन् २००१ मा मयूर विहार नजिकै दुई जनालाई हत्या गरेको घटनामा पनि यो गिरोह संलग्न रहेको बताइएको छ।