लागू औषध जस्तो देखिने वस्तुसहित कञ्चनपुरमा छ युवा पक्राउ

महेन्द्रनगर

२०८२ चैत ०६ गते शुक्रबार

जिल्लाको बेलौरी नगरपालिका–१० सडकघाटबाट अवैध लागूऔषध खैरो हिरोईन जस्तो देखिने धुलो पदार्थ १४ ग्राम ७२० मिलिग्रामसहित २ जनालाई शुक्रवार राति प्रहरीले पक्राउ गरेको हो। पक्राउ पर्नेहरूमा डडेलधुराको अमरगढी नगरपालिका-१ मालुम बस्ने २५ वर्षीय यादब तमौली र सोही नगरपालिका-५ बागबजार बस्ने १८ वर्षीय किशोर रहेका छन्।

इलाका प्रहरी कार्यालय बेलडाँडी र प्रहरी चौकी भुडा, कञ्चनपुरबाट संयुक्त रुपमा खटिएको प्रहरी टोलीले भारतबाट नेपालतर्फ आउँदै गरेको से ७ प २०९९ नम्बरको मोटरसाइकलमा सवार उनीहरूलाई चेकजाँच गर्दा उक्त पदार्थ फेला पारि उक्त पदार्थ, मोटरसाइकलसहित दुवै जनालाई पक्राउ गरेको जनाएको छ।

यसैगरी, बेलौरी नगरपालिका–१० सडकघाटबाट अवैध लागूऔषध खैरो हिरोईन जस्तो देखिने धुलो पदार्थ १५ ग्राम १६० मिलिग्राम सहित ४ जनालाई शुक्रबार राति प्रहरीले पक्राउ गरेको छ। पक्राउ पर्नेहरूमा शुक्लाफाँटा नगरपालिका–११ कलुवापुर बस्ने २६ वर्षीय हिक्मत बोहरा (सहचालक), कृष्णपुर नगरपालिका–५ गुलरिया बस्ने २४ वर्षीय दिपेन्द्र बिष्ट, कैलालीको गोदावरी नगरपालिका–३ मालाखेती बस्ने २७ वर्षीय सुरेन्द्र साँउद (चालक) र दार्चुलाको शैल्यशिखर नगरपालिका–६ उल्लानी बस्ने २८ वर्षीय जनक सिंह धामी रहेका छन्।

इलाका प्रहरी कार्यालय बेलडाँडी, कञ्चनपुरबाट खटिएको प्रहरी टोलीले सुदूरपश्चिम प्रदेश ०२–००१ ज ६३० नम्बरको बिद्युतिय हाइसमा सवार उनीहरूलाई शंका लागि चेकजाँच गर्दा उक्त पदार्थ फेला पारि उक्त पदार्थ, हाइससहित चारै जनालाई पक्राउ गरेको जनाएको छ।