काग्रेस कैलाली सभापतिमा भट्ट बिजयी

महेन्द्रनगर

२०७८ फागुन १९ गते बिहिबार

नेपाली काँग्रेस कैलालीको सभापतिमा प्रकाश बमलाई पराजित गर्दै नारायणदत्त भट्ट विजयी भएका छन् । पहिलो चरणमा बम भन्दा ९७ मतले पछि परेका भट्टले दोश्रो चरणमा बमलाई २ सय ६३ मतले पराजित गर्दै सभापतिमा विजयी भएका हुन् ।
सभापतिमा विजयी भएका भट्टले एक हजार ३५९ मत पाएका छन् भने उनका प्रतिष्पर्धी प्रकाश बमले १ हजार ९६ मत पाएका हुन् । पहिलो चरणमा कुनै पनि उम्मेदवारले बहुमत ल्याउन नसकेपछि बिहीबार धनगढीस्थित कैलाली उद्योग वाणिज्य संघको सभाहलमा दोश्रो चरणको निर्वाचन भएको थियो । पहिलो चरणबाट बाहिरिएको कोइराला समुहले वमलाई समर्थन गर्ने घोषणा गरेको थियो ।
पहिलो चरणमा कोइराला पक्षले १ सय ९७ मत ल्याएको थियो । कोइराला पक्षले सहयोग गर्ने घोषणा गरेपनि बमको मत भने पहिलो चरण भन्दा दोश्रो चरणमा घटेको छ । प्रकाश वमले पहिलो चरणमा १ हजार १६९ मत ल्याउँदा दोश्रो चरणमा उनको मत घटेको छ ।
काँग्रेस कैलालीमा २ हजार ५ सय ७५ मतदाता रहेकोमा दोस्राे चरणको मतदानमा २ हजार ४ सय ६७ मतदाता सहभागि भएका थिए । सभापतिको टुङ्गो लागेसँगै आज राती देखिनै अन्य पदाधिकारीको मत गणना सुरु हुने कैलाली काग्रेस निर्वाचन अधिकृत टेकनाराण सुवेदिले बताए ।