चुनाव उपयाेग गर्ने नगर्ने दुई लाईनले बिप्लपकाे बैठक लम्बियाे

महेन्द्रनगर

२०७८ चैत ०६ गते आइतबार

नेत्र विक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) मा आगामी चुनावमा सहभागिता हुने–नहुनेबारे दुई लाइन देखिएको छ । शुक्रबारदेखि कपिलवस्तुमा सुरु भएको पार्टी केन्द्रीय समिति बैठकमा महासचिव विप्लवले चुनावलाई उपयोग गर्ने नीतिका साथ राजनीतिक प्रतिवेदन पेश गरेपछि छलफलमा सहभागी केन्द्रीय सदस्यहरुले फरक फरक धारणा राखेका हुन् ।
आजको बैठकमा १० जनाले आफ्ना धारणा राखेका छन् । विप्लवले प्रस्तुत गरेको प्रतिवेदन अध्ययन गरेपछि आजदेखि आफ्ना धारणा राख्ने क्रममा आज १० जनाले विचार प्रस्तुत गरेका हुन् । शनिबार ४ जना स्थायी समिति सदस्य र ६ जना केन्द्रीय सदस्यहरुले प्रतिवेदनमाथि आफ्ना धारण राखेको एक नेताले जानकारी दिए ।
सुरुमा समूहगत रुपमा छलफल गर्ने तयारी भएपनि सबैले आ–आफ्ना राख्न चाहेपछि केन्द्रीय सदस्य र स्थायी समिति सदस्यहरु दुवैले आ आफ्ना धारणा राखेका हुन् । धारणा राख्नेमा ६ जना केन्द्रीय सदस्यहरु मध्ये तीन जनाले चुनाव बहिस्कार गनुपर्ने बताएका छन् । यस्तै ३ जनाले प्रयोग गनुपर्ने धारणा राखेको माओवादी स्रोतले बताएको छ ।
बैठक आईतबार विहान ८ बजेदेखि पुनः सुरु हुने केन्द्रीय सदस्य पदम जिसीले बताए । बैठकमा धारणा राख्ने धेरै भएपछि बैठक लम्बिन पुगेको हो। चुनावको मिति नजिकिदै जाँदा सशस्त्र संघर्षबाट शान्तिपूर्ण राजनीतिमा आएको नेकपाले लिने निर्णयलाई महत्वका साथ हेरिएको छ ।