उद्योग, वाणिज्य तथा आपूर्ति मन्त्री दिलेन्द्रप्रसाद बडूले आगामी आर्थिक वर्षदेखि नेपालमा औद्योगिक वातावरण बन्ने बताएका छन् । आयात प्रतिस्थापन तथा निर्यात वृद्धि र रोजगारी वृद्धिका लागि उत्पादनमूलक उद्योगको छुट्टै महत्व रहेकाले यस्तो उद्योगको प्रोत्साहनमा लाग्ने उनले बताएका हुन् ।

उत्पादन वृद्धि गर्नका लागि चाहिने कानून र नीति बनाउन सरकार तयार रहेको समेत उनले बताए । यसका लागि उद्योगीले भनेअनुसार कानून निर्माणमा हदैसम्मको लचकता अपनाउने उनको योजना छ । बजेटको पूर्वसन्ध्यामा सरोकारवालाहरू निकायसँगको भेटघाट बाक्लो बनाएका मन्त्री बडूले आगामी आर्थिक वर्षको बजेट उत्पादनमूलक उद्योग प्रोत्साहनमूखी हुने बताए । त्यसमा साना तथा मझौला उद्योगसमेत समेटिने उनको भनाइ छ ।

स्वदेशी उद्योग र उत्पादन बढाउन दशकव्यापी अभियान, एकल बिन्दु सेवा केन्द्रलाई अधिकारसम्पन्न, कम्पनी रजिस्टारमा अनलाइन सेवा, आवश्यक नीतिगत व्यवस्था गर्ने र औद्योगिक पूर्वाधार निर्माणमा पहलकदमी भूमिका खेल्नेसमेत उनले बताएका छन् । 

हाल नेपालमा सबैभन्दा धेरै आयात हुने वस्तुको सूचीमा पेट्रोलियम पदार्थ शीर्ष स्थानमा पर्छ । जसअनुसार, वर्षमा खर्बौ रकम बराबरको डिजेल, पेट्रोल र एलपीजी ग्यास आयात हुन्छ । यी वस्तुको आयात गर्दा ठूलो मात्रामा विदेशी मुद्रा गुमाउनु पर्छ । त्यसैले विदेशी मुद्रा जोगाउन र आयात घटाउन विद्युतमा अनुदान दिने योजना उद्योग मन्त्रालयको छ । यसका लागि खाना पकाउने एलपीजी ग्यासमा दिइँदै आएको प्रतिसिलिन्डर १ हजार ५० रुपैयाँ अनुदानको विकल्प खोजी भइरहेको छ ।

यसको खपत घटाउन ठूला–ठूला तारे होटलमा विद्युतबाट खाना पकाउन प्रोत्साहन गरिने र उद्योग तथा सर्वसाधारणको भान्सामा समेत इण्डक्सन चुलो भित्र्याउने योजना मन्त्रालयको छ । यसका लागि विद्युतमा अनुदान दिने योजनाअनुसार काम अघि बढिरहेको मन्त्री बडूको भनाइ छ । उद्योग, ठूला होटलमा खपत हुने एलपीजीभन्दा सस्तो पार्ने गरेर विद्युतमा अनुदानको तयारी भइरहेको मन्त्रालय स्रोतले जानकारी दिएको छ ।