प्लेनमा चुराेट पिउने उपाध्याय प्रहरी नियन्त्रणमा

बुधबार दिउसाे काठमाडौंबाट धनगढीका लागि उडेको बुद्ध एयरको जहाज भित्र चुरोट तान्नेका टीकापुरका २९ वर्षीय नारायण उपाध्यायलाई प्रहरीले पक्राउ गरी अभद्र व्यवहारमा मुद्दा चलाउने तयारी गरेको छ ।

सवा ३ बजे काठमाडौंबाट धनगढीका लागि उडेको बुद्ध एयरको जहाजमा उपाध्यायले चुरोट तानेका हुन् । शौचालय गएर चुरोट तान्दै सिटमा आएर बसेपछि आकाशमै रहेको जहाजमा तनाव सृजना भएको थियो ।

जहाजमा चुरोटको धुँवा देखिएपछि यात्रुहरु आगो लागेको आशंकामा त्रसित भएको प्रत्यक्षदर्शी यात्रुहरुले बताएका छन ।

जहाज धनगढी विमानस्थलमा अवतरण गरेपछि उपाध्यायलाई प्रहरिले नियन्त्रणमा लिएको जिल्ला प्रहरी कार्यालय कैलालीका डिएसपी बेदप्रकाश जोशीले बताए ।

उनीबिरुद्ध अभद्र व्यवहारको मुद्धा चलाउने तयारी भएको र काठमाडौंस्थित बिमानस्थलका सुरक्षाकर्मीको लापरवाही देखिए उनीहरुमाथि पनि विभागिय कारवाही हुने उनको भनाई छ ।