बैतडिमा महिलाका नाममा उद्याेग दर्ता बढ्दाे अवस्थामा

बैतडी

हरि प्रसाद जोशी

२०७९ साउन २८ गते शनिबार

बैतडीमा पछिल्लाे समय महिलाको नाममा साना तथा घरेलु उद्योग दर्ता हुने क्रम बढेको छ । राजश्व कम लाग्ने भएकाले महिलाका नाममा उद्योग दर्ता गर्ने क्रम बढ्दै गएको हो ।

दुई वर्षमा मात्रै यहाँ महिलाका नाममा पाँच सय आठ उद्योग दर्ता भएका छन् । घरेलु तथा साना उद्योग कार्यालयका सूचना अधिकारी लक्ष्मण साउँदका अनुसार आर्थिक वर्ष २०७८/७९ मा सात सय ५४ उद्योग दर्ता भएकामा दुई सय ७१ उद्योग महिलाका नाममा दर्ता भएका भएका छन् । यस्तै २०७७/७८ मा पाँच सय ९४ साना उद्योग दर्ता भएकामा दुई सय ३७ उद्योग महिलाका नाममा दर्ता भएका छन् । महिलाका नाममा उद्योग दर्ता भए ५० प्रतिशत राजश्व छुट हुने, सरकारले महिलाका नाममा कृर्षि कर्जा, महिला उद्यम कर्जाकाे ब्याजमा सहुलियत दिने र बैंक तथा वित्तीय संस्थाहरुले अनिवार्य लगानि गर्नुपर्ने ब्यावस्था गरेपछि महिलाका नाममा अहिले उद्योग दर्ता गर्ने क्रम बढ्दै गएको हो ।

राजश्व छुटका साथै महिला पनि उद्योग चलाउन सक्षम छन् भन्ने देखाउनका लागि महिलाहरुकाे नाममा उद्योग दर्ता बढ्न थालेकाे महिला नेत्रि स्वेता भट्टले बताइन् । बैतडीमा हालसम्म तीन हजार पाँच सय ९० उद्योग दर्ता भएका छन् ।