माननीय गिरिकाे अन्तेष्टि २ बजे गरिने ।

महेन्द्रनगर

२०७९ भदौ ०५ गते आइतबार

दिवंगत कांग्रेस नेता प्रदीप गिरिको पार्थिव शरिरमा पार्टी सभापति एवम् प्रधानमन्त्री शेरबहादुर देउवाले पार्टीको झण्डा ओढाई सम्मान गरेका छन् । काँग्रेस पार्टी केन्द्रिय कार्यालय सानेपामा राखिएको उनको पार्थिव शरिरमा प्रधानमन्त्री देउवाले पार्टीको झण्डा ओढाई सम्मान गरेका हुन् ।

त्यस अवसरमा काँग्रेस वरिष्ठ नेता रामचन्द्र पौडेल, महामन्त्री गगनकुमार थापा, नेता शेखर कोइरालालगायतका नेता, कार्यकर्ताहरूको बाक्लो उपस्थिति रहेका थियो । यसअघि मेडिसिटी अस्पतालमा पनि पुगेर विभिन्न राजनीतिक दलका नेताहरुले उनको पार्थिव शरिरमा श्रद्धाञ्जली अर्पण गरेका थिए ।

नेता गिरिको आजै अपरान्ह २ बजेपछि अन्त्येष्टि गरिने काँग्रेसले जनाएको छ । नेपाली राजनीतिमा बौद्धिक नेताको पहिचान बनाउन भएका नेता गिरी घाँटीको क्यान्सरबाट पीडित थिए । नेताहरुले उनको बौद्धिकताको अभाव नेपाली राजनीतिमा सदा खट्किरहने बताएका छन् ।

कर्मले, लेखनले, विचारले, समयले र परिश्रमले नेपालको समाजवादी आन्दोलनको सबैभन्दा अग्ला व्यक्तित्व गिरी भएको पनि सामाजिक सञ्जालहरुमार्फत् नेताहरुले टिप्पणी गरेका छन् । निष्ठामा अडिग इमान्दार जनप्रतिनिधिको रुपमा पनि उनलाई सबैले चिन्ने गरेका थिए ।

गिरीकै निधनका कारण आज बोलाइएको प्रतिनिधिसभा बैठक पनि स्थगित गरिएको छ । गिरीको ७५ वर्षको उमेरमा गएराति साँढे नौ बजे ललितपुरको भैंसेपाटीस्थित मेडिसिटी अस्पतालमा उपचारको क्रममा निधन भएको हो ।