सुदुरपश्चिम विश्वविद्यालयमा नियम बिपरित गरिएका नियुक्तिहरु खारेज गर्न नेकपा (एकिकृत  समाजवादि) निकट विद्यार्थी संगठन अनेरास्ववियुले माग गरेकाे छ ।
बुधबार अनेरास्ववियु कंचनपुर संयाेजक प्रज्वल र ईन्चार्ज रमेश पन्त द्वारा हस्ताक्षरित प्रेस बिज्ञप्तिमा अनेरास्ववियुले विश्वविद्यालय भित्र हुने हरेक नियुक्तिहरु खुला प्रतिस्पर्धाका माध्यमबाट हुनु पर्ने माग राखेकाे हाे ।

राजनीतिक भागबण्डाबाट विश्वविद्यालय जर्जर भई शैक्षिक गुणस्तर खस्किएको र विद्यार्थी माथि अभिभावकको लागनी र विद्यार्थी जीवन नै कठिन अवस्थामा पुग्ने अवस्था सृजना भएको छ बिज्ञप्तिमा उल्लेख गरेकाे छ ।

अनेरास्ववियुले बिज्ञप्तिमा भनेकाे छ सुदूरपश्चिम विश्वविद्यालयले हामीले गरेको अनुरोधको वेवास्था गरी पछिल्लो पटक राजनीतिक भागवण्डाका आधारमा क्याम्पस प्रमुख र विभाग प्रमुखहरुको नियुक्ति गरेको छ । यसरी गरिएका नियुक्तिहरु विश्वविद्यालयको विद्यमान नियम विपरीत समेत रहेका छन ।

विश्वविद्यालयको नियमानुसार क्याम्पस प्रमुख र विभागीय प्रमुख विश्वविद्यालयको स्थायी सेवामा रहेको हुनु पर्दछ। तर हाल गरिएका नियुक्तिहरुमा कतिपय क्याम्पस प्रमुख र विभागीय प्रमुख स्थायी सेवामा नरहेको भएता पनि राजनीतिक दबाब तथा उपकुलपति र रजिष्ट्रारले राजनीतिक लाभका लागि नियम विपरीत हुने गरी नियुक्त गरेको संगठनको ठहर छ ।

विश्वविद्यालयलाई स्वच्छ शैक्षिक हबका रुपमा निर्माण गर्नुका साटो पदिय जिम्मेवारीमार्फत राजनीतिक लाभ लक्षित गतिविधि एवं नियम विपरीतका गतिविधि अनेरास्ववियूलाई कदापी मान्य हुँदैन । तसर्थ, राजनैतिक लाभ प्रेरित भई गरेका सम्पूर्ण नियुक्तिहरु खारेज गरी खुला प्रतिस्पर्धाबाट पुनः क्याम्पस प्रमुख र विभागप्रमुख लगायत अन्य पदाधिकारी नियुक्त गर्न सम्बन्धित पक्षसँग जोडदार माग गर्दछ  बिज्ञप्तिमा उल्लेख छ ।

नियम विपरीत भएका नियुक्तिहरु ५ दिन भित्र खारेज गरी खुल्ला प्रतस्पिर्धाबाट क्याम्पस प्रमुख, विभाग प्रमुख र अन्य पदाधिकारी नियुक्तिको प्रक्रियाको थालनी नगरिएमा अनेरास्ववियू जुनसुकै कदम चाल्न बाध्य हुने प्रेस विज्ञप्ति मार्फत जानकारी दिएकाे छ ।