धनगढीस्थित नवजीवन अस्पतालको शय्यामा सात दिन देखि छटपटाइरहेकी ममता (नाम परिवर्तित) विरामि परेर थलिएकी भने होइनन् । श्रीमान् पनि घरमा नभएका बेला बेसहारा अवस्थामा रहेकी उनीमाथि त अन्धविश्वास र रुढीवादी परम्परामा जकडिएको समाजले बोक्सीको आरोप लगाउँदै मरणासन्न हुने गरि कुटपिट गरेको छ । 
कैलालीको भजनी नगरपालिका घर भएकी उनलाई गाउँलेहरुले बोक्सीको आरोप लगाउँदै सामूहिक कुटपिट गरेपछि सिकिस्त भएर अस्पताल भर्ना भएकी छिन् । उनलाई पिठ्युु र तिघ्रामा लाठीले हिर्काइयो, कपालको रौं समातेर लछार्दै लछारपछार गरियो । पुरुष र महिलाहरु मिलेर लात्तैलात्ताले छातीमा बजारे । उनीमाथि सामूहिक कुटपिट हुँदा जोगाउने कोही भएनन्, बरु रमिते बन्नेहरु धेरै भए । 
एकपटक मात्रै होइन, दुुई पटक उनीमाथि बेस्सरी कुटपिट गरियो । पुस १ गते पहिलोपटक गाउँलेहरुले घरमै आएर कुटेका थिए । ४ गते दोस्रो पटक कुटपिट गरियो । पहिलो पटकको कुटपिटपछि पीडितले इलाका प्रहरी कार्यालय कैलालीमा उजुरी पनि दिएकी थिइन् । तर प्रहरीले लापरवाही गर्‍यो । घटनाको गम्भिरताप्रति वेवास्ता गर्‍यो ।
प्रहरीले आवश्यक सतर्कता नअपनाउँदा दोस्रो पटक उनीमाथि झन् धेरै कुटपिट गरियो । ‘प्रहरी प्रशासनमा सब हामीले भनेको चल्छ, तलाई बचाउने कोही पनि छैन भन्दै धम्काइरहेका थिए,’ उनले भनिन् । त्यही भएर उनीमाथि पहिलो पटकभन्दा झन धेरै पीडा र मरणासन्न हुने गरि दोस्रो पटक कुटपिट भयो । ‘तर बाँच्नु लेखेको रैछ, फरुवाले टाउकामा हान्न खोज्दै थिए, ठिक्क मेरो श्रीमान आएर फरुवा खोस्नुु भयो । म बाँचे,’ उनले भनिन् ।
किन लगाइयो बोक्सीको आरोप ? 
भजनका मनोज चौधरीलाई गुुरुवा आयो भनेर सबै नातेदारहरुले एक हजार बुुझाउनुु पर्ने र गुुरुवाको घरमा उपस्थित हुनुुपर्ने उर्दी जारि भयो । ज्याला मजदुरी गरेर छाक टार्दै आएकी ती महिलाको घरमा एक सुको थिएन । श्रीमान केही दिनअघि ज्याला मजदुरीका लागि भारतको पुुना गएका थिए । केही उपाय नभएपछि उनले माइतीबाट मागेर एक हजार रुपैयाँ गुुरुवाको घरमा बुुझाइन् । 
तर उनी गइनन् । उनी नगएको निहुँमा गुुरुवा परिवार र नातागोताले उनीमाथि रिसबी साँधे । बोक्सीको आरोप लगाए । कुटपिट गरे । सबै गाउँलेहरु एकातिर, उनी अबला झै एक्ली परिन् । उनलाई कुटपिटबाट बचाउने कोही भएन । कुटपिट गर्दै उनको शरिरमा पानी खन्याउन थाले । तर त्यो अवस्था सबै गाउँलेहरुका लागि रमिते जस्तै बनिरह्यो । भलमन्सा रमिते बने, दाजुुभाई रमिते बने, नातागोता रमिते बने ।   
उनी बेहोस भइन् । श्रीमानले भजनी प्राथमिक स्वास्थ्य चौकी लिए । तर त्यहाँका स्वास्थ्यकर्मीले उपचार हुन नसक्ने भन्दै राम्रो अस्पतालमा लैजान रेफर गरे । त्यसपछि उनलाई धनगढीस्थित नवजीवन अस्पतालमा ल्याइयो । नवजीवन अस्पतालमा उनलाई ६ दिनसम्म आइसियुुमा राखेर उपचार गर्नु पर्यो । अहिले उनलाई वार्डमा सारिएको छ । डाक्टरहरुले उनलाई केहि दिन अस्पतालमै राखेर उपचार गर्नुपर्ने भनेका छन् ।   
प्रहरीले बाबुराम चौधरी, मनोज चौधरी, लाहानुु चौधरी र रुपा चौधरीलाई पक्राउ गरेको छ । करन र जयराम चौधरी भने फरार रहेको प्रहरीको भनाई छ । इलाका प्रहरी कार्यालय भजनीका प्रहरी निरीक्षक युुवन  चौधरी खुलेर भन्न चाहदैनन् । जिल्ला प्रहरी कार्यालयका एसपी पदम बिष्ट ‘घटनावारे विस्तृत जानकारी’ इलाका प्रहरीलाई नै होला भन्छन् । कैलालीका प्रमुख जिल्ला अधिकारी धर्मेन्द्रकुमार मिश्र बोक्सीको आरोप लगायतका घटनामा शून्य सहनशीलताको नीति रहेको बताउँछन् ।