दार्चुलामा ५ दिनदेखि अवरुद्ध सडक सुचारु

दार्चुला

२०८१ माघ १५ गते मङ्गलबार

दार्चुलाको महाकाली नगरपालिका–५ किम्तडी ठण्याकाठामा सडक निर्माणको क्रममा पहिरो खस्दा पाँच दिनदेखि अवरुद्ध महाकाली लोकमार्ग अन्तरगत खंलगा–गोकुलेश्वर सडक खण्ड पहिरो पन्छाएर सुचारु भएको छ ।
अवरुद्ध सडक सञ्चालनको लागी निर्माण व्ययसायीले स्काइभेटर मेसिन लगाएर हिजो देखि काम थालेकोमा आज दिउँसोपछि यातायातका साधनहरू पास भएको दार्चुलाका प्रमुख जिल्ला अधिकारी यज्ञराज जोशीले बताउनुभयो । सडक भासिएकोले अहिले पनि उक्त क्षेत्रमा जोखिम भने कायमै रहेको छ ।
सडक अबरुद्ध हुदा जिल्लाका विभिन्न स्थानका साथै दार्चुलाबाट कैलाली, कञ्चनपुर, काठमाण्डौँका लागि छुट्ने र जिल्ला सदरमुकाम खलंगा भित्रिने यातायातका साधनहरु र यात्रुहरुलाई समस्या भएको थियो । खलंगाबाट किम्तडीसम्म पैदल हिडेर यात्रा गर्न समेत असहज भइरहेको थियो । जिल्ला सदरमुकाम जोड्ने राजमार्ग अवरुद्ध भएपछि किम्तडीबाटै सवारीसाधनहरु ओहोरदोहोर गरिरहेका थिए । सडक सञ्चालनमा आएसंगै यात्रु र व्यवसायीलाई सहज भएको छ ।