सुदुरपश्चिममा बिषयगत समिति सभापति निर्बिराेध

महेन्द्रनगर

२०८१ फागुन ०५ गते आइतबार

सुदुरपश्चिममा बिषयगत समिति सभापति निर्बिराेध

सुदूरपश्चिम प्रदेश सरकारमा सहभागी दलहरुबीच भागबन्डा मिलेपछि प्रदेशसभाका विषयगत समितिका सभापति निर्विरोध चयन भएका छन्।

प्रदेशसभा सचिवालयले सभापतिको मनोनयन दर्ताका लागि दिएको समयअनुसार शनिबार दिउँसो ४ बजेसम्म सभापति खाली रहेका समितिको सभापतिका लागि एकल उम्मेदवारी परेको हो। आधिकारिक घोषणा भने आइतबारमात्रै हुने प्रदेशसभा सचिवालयले जनाएको छ।

सार्वजनिक लेखा समितिको सभापतिमा प्रमुख प्रतिपक्षी नेकपा माओवादी केन्द्र संसदीय दलका उपनेता अक्कलबहादुर रावल, सामाजिक विकास समितिको सभापतिमा नेकपा एमालेका सांसद धर्मराज पाठक र अर्थविकास तथा प्राकृतिक स्रोत समितिको सभापतिमा नागरिक उन्मुक्ति पार्टी संसदीय दलका नेता घनश्याम चौधरीले एकल उम्मेदवारी होलेका छन्।

कांग्रेस र एमालेबीच भएको भागबन्दा बमोजिम विशेष समितिको सभापतिका लागि नेपाली काँग्रेसकी सांसद तुलसी देवकोटाले एकल उम्मेदवारी दिएकी छन्। प्रदेशसभामा विशेष समिति भागबन्डा मिलाउन सत्तारूढ दलबीच सहमति भएको थियो।

प्रदेशसभा सचिवालयका सूचना अधिकारी युवराज जैसीले चारवटै समितिको सभापतिका लागि एक/एक जनाको मात्र उम्मेदवारी परेकोले निर्विरोध भएको घोषणा सम्बन्धित समितिको बैठकले आइतबार गर्ने जनाए। उम्मेदवारविरुद्ध दावीविरोधको प्रकृया पूरा भएपछि आइतबार मध्यान्ह १२ बजे उम्मेदवारको अन्तिम नामावली प्रकाशन गर्ने र १ बजे समितिहरुको बैठक बसी निर्वाचन गर्ने निर्वाचन तालिका छ।

सभापति मन्त्री बनेपछि अर्थविकास समिति गत वर्ष फागुनबाट र सार्वजनिक लेखा तथा सामाजिक विकास गत जेठदेखि नेतृत्वविहीन थिए। समितिको नेतृत्व नभएकाले संसदीय समितिहरुको काम कारबाही फितलो भएको थियो।

पुस ११ मा सत्तारुढ दल नेपाली कांग्रेस र नेकपा एमालेबीच विषयगत समितिको सभापतिमा भागबन्डा भएको थियो। आज सोही सहमतिअनुसार कांग्रेस, एमाले, माओवादी र नागरिक उन्मुक्ति पार्टीले उम्मेदवारी दर्ता गरेका हुन्।