विपद् पूर्वतयारीका लागि सरोकारवालाहरुलाई ‘पूर्वानुमानमा आधारित पूर्वकार्य गर्नका लागि डिजिटल प्रणाली’ दास्ता सम्बन्धी अभिमुखीकरण गरिएको छ् । जीएसएमए र यूके एडको आर्थिक सहयोगमा नेपाल राष्ट्रिय समाज कल्याण संघ (एनएनएसडब्ल्यूए), डीसीए, इन्स्टिट्यूट अफ हिमालयन रिक्स रिडक्सन (आईएचआरआर) र भीयामोको साँझेदारीमा नक्सा प्रालिद्वारा सञ्चालित दास्ता प्रणाली र एक्ट फस्ट परियोजना सम्बन्धी सिकाई आदान प्रदान गर्न प्रदेश स्तरीय तथा स्थानीय सरोकारवालाहरुलाई अभिमुखीकरण गरिएको हो ।

 नक्सा प्रालिका कार्यकारी निर्देशक उत्तम पुडासैनीले कञ्चनपुरको भीमदत्त नगरपालिका र दोधारा चाँदनी नगरपालिका साथै डडेल्धुराको पर्शुराम नगरपालिकामा सञ्चालित दास्ता र एक्ट फस्ट परियोजनाको आधिकारीक समापन तथा सिकाई आदान–प्रदान र क्षमता अभिवृद्धि गर्नका लागि अभिमुखीकरण गरिएको बताउनुभयो । कार्यक्रममा भीमदत्त नगरपालिकाका नगर प्रमुख पदम बोगटीले दास्ता प्रणालीमा जोखिम नक्साङ्न तथा विश्लेषण, निगरानी र मूल्याकंन लगायतका तथ्याङ्क हुने भएकाले विपद् व्यवस्थापनका लागि सुरक्षित मार्ग तयार पार्न र राहत वितरण योजना बनाउने काममा समेत सहयोग पुगेको बताउनुभयो । 
उहाँले परियोजनाको समाप्ती पश्चात स्थानीय सरकारले अपनत्व लिनुपर्ने साथै बजेट विनियोजन गरेर परियोजनाको निरन्तरतामा ध्यान दिनुपर्ने आवश्यकता औल्याउनुभयो । 

त्यस्तै दोधारा चाँदनी नगरपालिकाका नगर प्रमुख किशोर कुमार लिम्बुले नेपाल राष्ट्रिय समाज कल्याण संघ (एनएनएसडब्लूए) र नक्सा लगाएतका संघ–संस्थाहरुको सहयोगमा विपद् व्यवस्थापनको क्षेत्रमा धेरै राम्रो काम भएको बताउनुभयो । उहाँले दास्ता मोबाईल एप मार्फत् पूर्वसूचना अनुसारको अग्रीम प्रतिकार्य गरिएकाले गत असारको आरी घोप्टे वर्षा हुदा समेत मानवीय क्षति हुनबाट जोगिएको स्मरण गर्नुभयो । अभिमुखीकरण नगरपालिकाका मेयर तथा उपमेयरहरु, वडा सचिवहरु, वातावरण अधिकृतहरु, सूचना तथा प्रविधि अधिकृतहरु साथै प्रदेश स्तरीय रुपमा विभिन्न चरणमा सम्पन्न गरिएको छ् । कार्यक्रममा सरोकारवालाहरुले दास्ता प्रमाणी मार्फत स्थानीय सरकार र सेवाग्राही संग तथ्याङ्क उपलब्ध हुने भएकोले पूर्वानुमानमा आधारित पूर्वकार्य गर्नका लागि सहजता हुने बताएका थिए ।