कञ्चनपुरको भीमदत्त नगरपालिका वडा नम्बर १३ का वडा अध्यक्ष राम बहादुर बोहरा ‘झक्कास’ ले वडाका ज्येष्ठ नागरिकहरूलाई स्थानीय धार्मिक क्षेत्रको अवलोकन भ्रमण गराएका छन्। यस कार्यक्रमले वडाका ज्येष्ठ नागरिकहरूलाई धार्मिक, सांस्कृतिक तथा ऐतिहासिक स्थलहरूसँग परिचित गराउँदै उनीहरूको सामाजिक सहभागिता बढाउने उद्देश्य राखेको थियो।

शुक्रवार वडाभित्रका ५० जना ज्येष्ठ नागरिकहरूलाई कञ्चनपुरका प्रसिद्ध धार्मिक स्थलहरू जस्तै सिद्धनाथ मन्दिर, विष्णु मन्दिर, भम्केनी धाम, रोटेला मन्दिर लगायतका क्षेत्रहरू अवलोकन गराइएको थियो। ती स्थानहरूको ऐतिहासिक महत्त्व र धार्मिक मूल्यबारे ज्येष्ठ नागरिकहरूलाई जानकारी गराइयो। त्यसैगरी, भीमदत्त-१३ मा अवस्थित श्री निवास रामानुज घाट तीर्थस्थलमा सन्ध्याकालीन आरती गराई ज्येष्ठ नागरिकहरूलाई घरसम्म सुरक्षित रूपमा पुर्‍याइएको थियो।

भ्रमणको क्रममा ज्येष्ठ नागरिकहरूले भम्केनी धाममा जगतगुरूसँग समेत भेटघाट गर्ने अवसर पाए। जगत गुरूसँग भएको भेटघाटमा ज्येष्ठ नागरिकहरूले धर्म, समाज र संस्कृतिसम्बन्धी विभिन्न जिज्ञासाहरू राखेका थिए। जगतगुरूले वृद्ध अवस्थामा पनि मानसिक शान्ति, आध्यात्मिक विकास र समाजसेवाको महत्वबारे जानकारी गराएका थिए। ज्येष्ठ नागरिकहरूले यस भेटघाटबाट निकै प्रभावित भएको प्रतिक्रिया दिएका छन्।

भीमदत्त -१३ का वडा अध्यक्ष राम बहादुर बोहराले ज्येष्ठ नागरिकहरूलाई धार्मिक स्थल भ्रमण गराउनु आफ्नो सामाजिक दायित्व भएको बताए। उनले भने, “ज्येष्ठ नागरिक हाम्रो समाजको मेरुदण्ड हुन्। उनीहरूको खुसीका लागि यस्ता कार्यक्रम आवश्यक छन्। धार्मिक स्थल अवलोकनले उनीहरूमा सकारात्मक ऊर्जा थप्ने विश्वास लिएको छु। भविष्यमा पनि यस्ता कार्यक्रम निरन्तर गरिनेछन्।”

वडा अध्यक्ष बोहराले थपे, “हाम्रो वडा भौतिक विकासका साथै सामाजिक र सांस्कृतिक गतिविधिहरूमा पनि अगाडि बढ्दैछ। ज्येष्ठ नागरिकहरूप्रति सम्मान र सद्भाव व्यक्त गर्न यस्ता कार्यक्रमको आयोजना गरिएको हो। म सबै स्थानीय बासीलाई आग्रह गर्न चाहन्छु कि हामी हाम्रा ज्येष्ठ नागरिकहरूको सम्मान गर्दै उनीहरूका सुख दुःखमा सहभागी बनौँ। वडाले भविष्यमा स्वास्थ्य शिविर, सचेतना कार्यक्रम लगायतका कार्यक्रमहरू पनि सञ्चालन गर्ने योजना बनाएको छ।”

स्थानीय राम चन्द्र गिरिले यस कार्यक्रमलाई स्वागत गर्दै भने, “वडा अध्यक्षले ज्येष्ठ नागरिकहरूलाई धार्मिक स्थल घुमाउने कार्यक्रम ल्याएर समाजमा सकारात्मक सन्देश दिनुभएको छ। यस्तो कार्यक्रम भविष्यमा पनि निरन्तर हुनुपर्छ। यसले समाजका अन्य युवाहरूलाई पनि प्रेरणा मिल्नेछ।”

राष्ट्रिय ज्येष्ठ नागरिक समाज कञ्चनपुरका जिल्ला अध्यक्ष धन बहादुर खडायतले भने, “समाजमा ज्येष्ठ नागरिकहरूको सम्मान बढाउने यस्ता कार्यले समाजलाई नै प्रेरित गर्छ। वडा अध्यक्षलाई धन्यवाद दिन चाहन्छु। आगामी दिनमा अन्य वडाहरूमा पनि यस्ता कार्यहरू सञ्चालन हुनु आवश्यक छ।”

त्यस्तै, स्थानीय खडक बहादुर विष्टले भने, “हामी जस्तै उमेरका मानिसलाई घरमै सीमित हुने स्थिति थियो। यस्तो धार्मिक भ्रमणले हामीलाई नयाँ अनुभव दिलाएको छ। वडा अध्यक्षलाई धन्यवाद दिन चाहन्छु। अब हाम्रा सन्तानहरूलाई पनि धर्म, संस्कृति र समाजप्रतिको चेतना बढाउन यस्ता कार्यक्रम महत्त्वपूर्ण छन्।”

यसै क्रममा भीमदत्त -१३ निवासी सन्त महात्मा चेतन जी महाराजले पनि आफ्नो विचार व्यक्त गर्दै भने, “ज्येष्ठ नागरिकहरू जीवनका अनुभवका भण्डार हुन्। उनीहरूलाई सम्मान गर्नु हाम्रो कर्तव्य हो। धार्मिक स्थलहरूको भ्रमणले उनीहरूमा आत्मिक शान्ति र उमङ्ग पैदा गर्छ। वडा अध्यक्षले उठाएको यो कदम स्वागतयोग्य छ। म सबैलाई धर्म, संस्कार र परोपकारको मार्गमा अघि बढ्न अनुरोध गर्दछु।”

यस कार्यक्रमले ज्येष्ठ नागरिकहरूलाई धार्मिक स्थलहरूको अवलोकन गराउनुका साथै समाजसँग अझ बढी जोड्ने अवसर प्रदान गरेको छ। ज्येष्ठ नागरिकहरूलाई सम्मान गर्दै तिनीहरूको सुख-सुविधामा ध्यान दिनु समाजका अन्य क्षेत्रका नेतृत्वकर्ताहरूका लागि पनि प्रेरणादायी हुने विश्वास गरिएको छ। साथै वडा अध्यक्ष राम बहादुर बोहरा ‘झक्कास’ को यो प्रयासले समाजमा सकारात्मक उदाहरण समेत प्रस्तुत गरेको छ।