गाउँपालिका हाकिम माथि कार्यकक्षमै कुटपिट

महेन्द्रनगर

२०८१ चैत २२ गते शुक्रबार

बझाङको छविसपाथिभेरा गाउँपालिकाका प्रमुख प्रशासकीय अधिकृत सञ्जय कुमार यादवमाथि कार्यकक्षमै कुटपिट भएको छ।

गाउँपालिका–२ का मुकेश ऐडीले बिहीवार यादवमाथि आक्रमण गरेका हुन्। यादव हालै मात्र गाउँपालिकाको हाकिमका रूपमा आएका थिए। कुटपिटबाट घाइते भएका यादवको हाल जिल्ला अस्पताल सिमखेतमा उपचार भइरहेको छ।

मुकेश ऐडी गाउँपालिकाका खेलकुद समिति सदस्यसमेत हुन् र जिप चालकको रूपमा कार्यरत छन्। उनले पालिकाले आफ्नो जिप प्रयोग गरे पनि भुक्तानी नदिएको भन्दै आक्रोशित भएर यादवलाई कुटपिट गरेको बताइएको छ।

जिल्ला प्रहरी कार्यालय, बझाङले घटनाबारे अनुसन्धान गरिरहेको छ। प्रहरीका अनुसार ऐडीलाई बोलाइएको छ, र केही व्यक्तिहरू प्रहरी कार्यालयमा उपस्थित भइसकेका छन्।

गाउँपालिकाले ऐडीको जिप प्रयोग गरेको एक लाख ४३ हजार रुपैयाँ भाडा तिर्न बाँकी रहेको जनाएको छ। चालु आर्थिक वर्षमा गाडी भाडाका लागि चार लाख रुपैयाँ विनियोजन गरिएकोमा हाल तीन हजार पाँच सय मात्र बाँकी रहेकाले भुक्तानी दिन नसकिएको बताइएको छ। पालिकाले बजेट रकमान्तर गरेर भुक्तानी गर्ने तयारी गरिरहेको छ।

मुकेश ऐडी तत्कालीन निमित्त प्रमुख प्रशासकीय अधिकृत गगन ऐडीका भतिजा हुन्। हालै मन्त्रालयको परिपत्रअनुसार सिनियरलाई प्रमुख प्रशासकीय अधिकृत बनाउने निर्णय भएपछि गगन ऐडी हटेका थिए, र सञ्जय यादवलाई जिम्मेवारी दिइएको थियो।