कञ्चनपुरका यातायात मजदुर आन्दोलित भएका छन । सवारी दुर्घटनाको घटनामा पक्राउ परेका एक चालक पुरपक्षका लागि जेल चलान भएपछि बिहीबारदेखि जिल्लाका मजदुर आन्दोलित भएका हुन । तीन मजदुर संघ संगठनको अगुवाईमा महेन्द्रनगर बसपार्क सहित पुर्वपश्चिम महेन्द्रराजमार्ग बन्द गरेर आन्दोलनमा उत्रिएका छन ।
 
यातायात व्यावसायीहरुले पूर्व–पश्चिम राजमार्गको चम्पापुर, भासी पुल र बसपार्कमा अवरुद्ध गरेको जिल्ला प्रहरी कार्यालय कञ्चनपुरका प्रहरी नायव उपरीक्षक उमेशराज जोशीले बताए। उनका अनुसार अवरुद्ध राजमार्ग खुलाउनका लागि यातायात व्यावसायीसँग छलफल भइरहेको छ। नेपाल यातायात मजदुर संघका सचिव रमेश ठगुन्नाले केही समयपछि पूर्व–पश्चिम खुल्ने बताए। ‘प्रशासन र यातायात व्यावसायीबीच छलफल भइरहेको छ,’ उनले भने, ‘केही समयमै सडक खुल्छ।’
 
माघ १९ गते महेन्द्रनगरबाट धनगढी जाँदै गरेको सुप्र ०२००१ ज ४४७ नम्बरको बस कृष्णपुर नगरपालिका-२, बंक सडक खण्डमा सोही दिशामा गइरहेको प्रदेश ३०२०१२ प ९४०२ नम्बरको मोटरसाइकललाई ठक्कर दिँदा मोटरसाइकल चालक सनत रेग्मी र सवार कमलकान्त जोशी सामान्य घाइते भएकाे र उपचारपछि घर फर्किएको विज्ञप्तिमा उल्लेख गरिएको छ।
 
उनीहरूको उपचार धनगढीस्थित निसर्ग अस्पतालमा यातायात प्रालिले गराएको थियो । बिहीबार यातायात मजदुर संगठनहरूका अनुसार उपचारपछि डिस्चार्ज भइसकेका जोशीले पदको दुरुपयोग गरी इलाका प्रहरी कार्यालय झलारीमा अंगभंगको मुद्दा दर्ता गराएका छन् ।
 
प्रहरी प्रशासनले कुनै छानबिन नगरी मुद्दा अघि बढाएको र चालक अवस्थीलाई दुई महिनादेखि बिना कारण अनावश्यक हिरासतमा राखिएको आरोप मजदुर संगठनहरूले लगाएका छन् । विज्ञप्तिमा अदालतमार्फत उनलाई कारागार चलान गराउन खोजिएको भन्दै कडा आपत्ति जनाइएको छ । संगठनहरूले चालक अवस्थीलाई अन्यायपूर्वक थुनामा राखेर मानसिक यातना दिइएको आरोप लगाउँदै उनको अविलम्ब रिहाइको माग गरेका छन् ।
 
माग सम्बोधन नभए चरणबद्ध आन्दोलन गर्ने चेतावनी दिँदै उनीहरूले २०८१ चैत २२ गतेदेखि सम्पूर्ण यातायात सेवा बन्द गर्ने घोषणा गरेका छन् । संयुक्त विज्ञप्तिमा नेपाल यातायात स्वतन्त्र मजदुर संगठन, नेपाल यातायात मजदुर संघ र अखिल नेपाल ट्रेड युनियन महासंघ, समन्वय समिति, कञ्चनपुरले हस्ताक्षर गरेका छन् ।