दोधारा चाँदनी नगरपालिकाका नगर प्रहरीहरुको आधारभूत तालिम सशस्त्र प्रहरी बल नेपाल नं. ३५ गण हेडक्वाटर शैलेश्वरी कञ्चनपुरमा सम्पन्न भएको छ । शनिबार तालिम समापन पछि दिक्षान्त समारोहको आयोजना गरिएको थियो । दोधरा चाँदनी नगरपालिकाका नगर प्रहरीहरुको दिक्षान्त समारोहमा नगर प्रमुख किशोर कुमार लिम्बु प्रमुख अतिथि रहनुभएको थियो । कार्यक्रममा नगर प्रमुख लिम्बुले स्थानीय तह सञ्चालन ऐन २०७४ मा नगर प्रहरीको व्यवस्था गरिएको उल्लेख गर्दै नगर प्रहरीले शान्ति, सुरक्षा र स्थानीय तहको सेवा प्रवाहमा महत्वपूर्ण भूमिका निर्वाह गर्ने बताउनुभयो । उहाँले तालिम प्राप्त नगर प्रहरीहरुले आफ्नो कर्तव्य र जिम्मेवारी प्रति गम्भीर भएर काम गर्नुपर्नेमा जोड दिनुभयो । कार्यक्रममा शैलेश्वरी गणका गणपति सशस्त्र प्रहरी उपरीक्षक लोकेन्द्र देव भट्टले तालिमको सफल समापनमा खुशी व्यक्त गर्दै नगरपालिका र नगर प्रहरी संगको सहकार्यले सीमा सुरक्षा, विपद् व्यवस्थापन तथा अन्य आपतकालीन अवस्थामा कार्य गर्न सहज हुने विश्वास व्यक्त गर्नुभयो । ३० दिनको अवधिमा सम्पन्न तालिममा नगर प्रहरीलाई सैद्धान्तिक तथा व्यवहारिक ज्ञान प्रदान गरिएको थियो । तालिममा नगर प्रहरीहरूले सलामी कवाज, खाली हात ड्रिल लगाएतका सीपहरु प्रदर्शन गरेका थिए । तालिम समापन समारोहमा नगर प्रमुख किशोर कुमार लिम्बु, नगर उपप्रमुख गंगा देवी जोशी, सशस्त्र प्रहरीका अधिकारीहरु, सञ्चारकर्मी, निड्स नेपाल र एनएनएसडब्ल्युएका प्रतिनिधिहरु, नगर प्रहरी प्रशिक्षक तथा  प्रशिक्षार्थीहरु, अभिभावक र अन्य अतिथिहरुको उपस्थिति रहेको थियो । सशस्त्र प्रहरी बल नेपाल नं. ३५ गण हेडक्वार्टर शैलेश्वरी गणको संक्षिप्त परिचय प्रस्तुत गर्दै गणका प्रतिनिधिहरुले शान्ति सुरक्षामा सशस्त्र प्रहरी बलको भूमिका तथा गणको संरचना र कार्य क्षेत्रबारे जानकारी गराएका थिए । सशस्त्र प्रहरी बल नेपाल नं. ३५ गण हे.क्वा. शैलेश्वरी कञ्चनपुरले १ सय २९ दशमलव ५ किलोमिटर लामो नेपाल–भारत सीमाको सुरक्षा गर्नुका साथै विपद् उद्धार, राजमार्ग सुरक्षा तथा अन्य आपतकालीन अवस्थामा सक्रियतापूर्वक सेवा प्रदान गर्दै आएको बताएका छन् ।