शुक्लफाटा नगर अस्पताल सुरु गरेको पाँच वर्षमा ८० प्रतिशत प्रगति, चाँडै निर्माण सम्पन्न हुने आशा

महेन्द्रनगर

२०८२ बैशाख २९ गते आइतबार

कञ्चनपुरको शुक्लाफाँटा नगरपालिका–४ असैनामा १० शय्याको नगर अस्पताल निर्माण अन्तिम चरणमा पुगेको छ।
पाँच वर्षअघि निर्माण थालिएको अस्पताल भवन ५ वर्ष पुग्दा ८०% प्रगति गर्दै अन्तिम चरणमा पुगेको हो।
निर्माण व्यवसायीले काममा ढिलाइ गरेपछि पटकपटक म्याद थप गरे पनि निर्माण सम्पन्न हुन सकेको छैन। अब भने निर्माण सम्पन्न हुने आशा गरिएको नगरपालिकाको पूर्वाधार विकास तथा व्यावस्थापन शाखाका प्रमुख दीपक धाँमीले बताए।

अस्पताल भवन निर्माणका लागि विसं २०७८ असार ७ गते ६ करोड २४ लाख ५८ हजार १०३ मा एमके निरज जेभीले ठेक्का लिएको थियो। भवन निर्माणका लागि थप गरिएको म्याद गत मङ्सिरमै सकिएको छ। निर्माण व्यवसायीले जरिवाना तिर्दै भवन निर्माणलाई निरन्तरता दिएको छ।अब भवनको प्रवेशद्वार, विद्युत् जडान, खानेपानी जडान, रङ्गरोगन, झयाल, ढोकालगायत ‘फिनिसिङ’को काम बाँकी छ।