स्वास्थ्य कार्यालय कञ्चनपुरको जनचेतनामूलक सूचना

भारतमा बन्धक बनाइएका ५७ जना नेपाल पुगे।

महेन्द्रनगर

२०८२ असार ११ गते बुधबार

आकर्षक रोजगारीको प्रलोभन देखाएर भारत उत्तराखण्डको रुद्रपुर र काशीपुरमा बन्धक बनाइएका ५७ जना नेपालीलाई उद्धार गरी आज बुधबार गड्डाचौकी नाका हुँदै नेपाल भित्र्याइएको छ ।

गड्डाचौकी नाकामा कञ्चनपुरका प्रमुख जिल्ला अधिकारी लक्ष्मण ढकाल र सुदूरपश्चिम प्रदेश प्रहरी प्रमुख डिआईजी डम्बरबहादुर विश्वकर्माले उनीहरुको स्वागत पनि गरेका छन् ।

‘किन इन्डिया’ नामक संस्थाको सहयोगमा भारतको नयाँदिल्लीस्थित नेपाली दूतावासले उनीहरुको उद्धार गरेको हो ।

उद्धार गरिएका मध्ये सुदूरपश्चिम घर भएकालाई आजै उनीहरुको घरतर्फ पठाइउको छ भने टाढा घर भएकालाई विभिन्न संघ संस्थाले बास र खानाको व्यवस्था गरेका छन् ।

उद्धार गरिएकामध्ये सुदूरपश्चिमको कैलालीका ९ जना र डोटीका २ जना रहेका छन् ।

त्यस्तै, चितवनका १०, सुनसरीका ५, उदयपुर, तेह्रथुमका र पाँचथरका ४–४, दाङ, स्याङजा र बाँकेका ३–३ जना, ताप्लेजुङ र धादिङका २–२ जना तथा सर्लाही, कास्की, रुकुम, बाग्लुंग, इलामा र रुपन्देहीका १–१ जनालाई उद्धार गरेर ल्याइएको छ ।

काशीपुरबाट ३५ जना र रुद्रपुरबाट २२ जनालाई उद्धार गरिएको हो ।

आकर्षक रोजगार दिने भन्दै रकमसमेत असुले पनि काशीपुर र रुद्रपुरमा उनीहरुलाई बन्धक बनाएर राखिएको पीडितहरुको भनाई छ ।