कञ्चनपुरको सीमा क्षेत्रमा सहस्त्र प्रहरीको एक बिओपी थप

महेन्द्रनगर

२०८२ भदौ १४ गते शनिबार

खड्डाकंकडमा सशस्त्र प्रहरी बल नेपालको नयाँ बोर्डर आउट पोस्ट बिओपी भवन शनिबार भएको एक कार्यक्रमका बीच उद्घाटन गरिएको छ ।

सुदूरपश्चिम प्रदेश सरकारको आन्तरिक मामिला तथा कानुन मन्त्रालयको रु। ४५ लाख बजेटमा निर्माण सम्पन्न भएको भवनको उद्घाटन प्रदेशका आन्तरिक मामिला तथा कानुन मन्त्री हिरा सार्कीले गर्नुभयो।

कञ्चनपुरको पुनर्वास नगरपालिका–८ मा उद्घाटन समारोहमा बोल्दै मन्त्री सार्कीले शान्ति, सुरक्षा र सीमा सुरक्षामा सशस्त्र प्रहरी बलको भूमिका अपरिहार्य रहेको उल्लेख गर्दै नयाँ भवनले सुरक्षाकर्मीलाई थप सशक्त र सहज रूपमा काम गर्न मद्दत पुग्ने विश्वास व्यक्त गर्नुभयो।

भवन उद्घाटनका अवसरमा सशस्त्र प्रहरी बल सुदूरपश्चिमका प्रमुख सशस्त्र प्रहरी नायब महानिरीक्षक प्रदीपकुमार पालले सीमा सुरक्षाका दृष्टिले यस्ता पूर्वाधार अत्यन्तै महत्वपूर्ण हुने उल्लेख गर्नुभयो। उहाँले प्रदेश सरकारले अन्य थुप्रै स्थानमा बिओपी भवन निर्माण गर्न बाँकी रहेको भन्दै त्यसतर्फ आवश्यक पहल गर्न आग्रह पनि गर्नुभयो।

समारोहकै अवसरमा समाजसेवी स्थानीय जग्गा दाता सिद्धराज ओझालाई सम्मान गरिएको थियो। आफ्ना स्वर्गीय बुबा शिवदत्त ओझा र आमा लक्ष्मी देवी ओझाको सम्झनामा खड्डाकंकड बिओपी भवन निर्माणका लागि ओझाले जग्गा दान गर्नुभएको हो। उहाँको योगदानलाई मूल्याङ्कन गर्दै मन्त्रालयका तर्फबाट मन्त्री सार्की र मन्त्रालयका निमित्त सचिव आमोद दहालले संयुक्त रूपमा सम्मानपत्र प्रदान गर्नुभयो।

भवन हस्तान्तरण समारोहमा प्रदेश तथा स्थानीय तहका जनप्रतिनिधि, सुरक्षाकर्मी, सरोकारवाला निकायका प्रतिनिधि तथा स्थानीयवासीको उपस्थिति थियो।