निषेधाज्ञा उल्लङ्घन गरेको आरोपमा सुर्खेतमा छ जना नियन्त्रणमा

महेन्द्रनगर

२०८२ भदौ २६ गते बिहिबार

जिल्ला प्रहरी कार्यालय सुर्खेतले निषेधाज्ञाको अवज्ञा गरेको कसुरमा ६ जना व्यक्तिलाई नियन्त्रणमा लिएको छ । जिल्ला प्रहरी कार्यालयका प्रहरी नायव उपरीक्षक मोहनजंग बुढथापाका अनुसार वीरेन्द्रनगरका विभिन्न स्थानमा निषेधाज्ञा पालना नगरी हिँडडुल गर्नेहरूलाई नियन्त्रणमा लिइएको हो ।

‎‎पक्राउ पर्नेमा जुम्लाका बद्री बोहोरा, सुर्खेत विजौराका मोहन थापा, कालिकोटको पचालझरनाका महेश बुढाथोकी, तिलागुफाका प्रेम कुँवर, शुभकालिकाका पुष्पराज शाही र पचालझरनाका मिलन बस्नेत छन् ।

‎‎शान्ति सुरक्षा र जनस्वास्थ्यलाई ध्यानमा राखी जारी गरिएको निषेधाज्ञा उल्लंघन गर्ने कार्यलाई प्रहरीले कडाइका साथ निगरानी गरिरहेको बुढथापाले बताए ।

‎प्रहरीले निषेधाज्ञाको पूर्ण पालना गर्न सबैलाई आग्रह गर्दै नियम उल्लंघन गर्ने जो कोहीलाई पनि कानुन बमोजिम कारबाही गरिने चेतावनी दिएको छ । निषेधाज्ञा बिहीबार बिहान ८ः३० बजेदेखि साँझ ६ः ०० बजेसम्म जारी गरिएको छ ।