निष्पक्षतामा प्रश्न उठाउँदै जेनजी समूहले अख्तियार दुरुपयोग अनुसन्धान आयोगका प्रमुख प्रेमकुमार राईको राजीनामाका लागि दबाब पत्र दर्ता गराएको छ । मंगलबार जेनजी समूहका प्रतिनिधिले टंगालस्थित कार्यालयमा पुगेर ज्ञापनपत्र दर्ता गराएका हुन् ।
प्रेम राईको राजीनामा माग गर्दै कार्यालयमा ज्ञापनपत्र दर्ता गराइएको जेनजी समूहका नेता रिजन राना मगरले जानकारी दिए । राईको राजीनामा मागिएको पत्र प्रधानमन्त्री कार्यालय र कानून मन्त्रालयमा पनि पठाइएको उनले बताए ।
जेनजी आन्दोलनको मुख्य माग नै भ्रष्टाचार र दण्डहीनताको अन्त्य भएकाले विवादित पृष्ठभूमिका व्यक्ति अख्तियारको प्रमुख रहिरहन नमिल्ने भएकोले राजीनामा माग गरिएको उनले बताए ।
‘प्रश्न उठेका र निष्पक्ष नभएका व्यक्ति भएकोले राजीनामा माग गरिएको हो, राजीनामा दिनुहुन्छ भन्ने विश्वास गरेका छौं,’ जेनजीका अर्का युवा अमित खनालले भने ।
राईले राजीनामा नगरे आफूहरूले दबाबमूलक कार्यक्रम गर्ने खनालले बताए ।
ज्ञापनपत्र दर्ता गर्न पुगेकी जेनजी समूहकी नेतृ वनिकाले देशले क्षति भोगको अवस्थामा नैतिकताका आधारमा राईले राजीनामा दिने विश्वास गरिन् । ‘अख्तियार प्रमुखको राजीनामा आएन भने त्यसपछि थप योजना बनाउँछौं,’ उनले भनिन् ।
प्रेम राईको राजीनामा माग गरिएको पत्र असोज २१ गते १६४०२ नम्बरमा दर्ता भएको जेनजी नेता रानाले जानकारी दिए । 
जेनजी समूहले राईमाथि राजीनामा गर्न इमेलमार्फत दबाब दिएका छन् । जेनजी समूहले अख्तियार प्रमुख राई नक्कली भुटानी शरणार्थी तथा वाइडवडी खरिदलगायत विभिन्न भ्रष्टाचार काण्डमा मुछिएको आरोप लगाएको छ ।
‘चयनमुखी अनुसन्धान’ गरेको भन्दै राईमाथि अनुसन्धान गर्नुपर्ने विशेष अदालतको आदेशलाई समेत आधार बनाएर जेनजी समूहले राजीनामा गर्न राईलाई दबाब दिएको थियो । केपी शर्मा ओली प्रधानमन्त्री रहेको समयमा अध्यादेशमार्फत गरिएको नियुक्ति संविधान सम्मत नभएको जेनजीको दबाब पत्रका उल्लेख छ ।
जेनजी समूहले राजीनामाको दबाब बढाएपछि अख्तियार बाहिर विशेष सुरक्षा अपनाइएको छ ।