अभिनेता प्रकाश सपुतले आफूले पूर्वप्रधानमन्त्री तथा नेकपा एमाले अध्यक्ष केपी शर्मा ओलीको प्रशंसा गर्नु गल्ती भएको बताएका छन् ।
पछिल्लो फिल्म ‘सोल्टिनी’ प्रवर्धनको क्रममा एक टेलिभिजनलाई अन्तर्वार्ता दिँदै उनले गल्ती स्वीकारेका हुन् ।
आफूले निर्माण गरेको फिल्म ‘वसन्त’ रिलिजअघि आयोजित समारोहमा सपुतले सोही कार्यक्रममा सहभागी तत्कालिन प्रधानमन्त्री ओलीको खुलेर प्रशंसा गरेका थिए ।
संघर्ष गर्नेको लागि ओलीको जीवन प्रेरणादायी रहेको उनले बताएका थिए । ओलीको प्रशंसा गर्दा तपाईंको हाइट घट्यो र व्यक्तित्वमा प्रहार भयो भन्ने कुरा मान्नुहुन्छ भनेर सोध्दा प्रकाशले यो कुरालाई आफूले मान्ने बताएका छन् ।
‘त्यो त सार्वजनिक रुपमा देखिएको कुरा हो’ उनले भनेका छन् ।
तपाईंले केपी शर्मा ओलीको प्रशंसा गर्नु चाहिँ गलत भयो ? भनेर सोधिएको अर्को प्रश्नमा प्रकाशले ‘गलत भयो’ भनेर जवाफ दिएका छन् ।
‘त्यो समयमा कुनै राजनीतिक व्यक्तित्वलाई हामीले प्रशंसा गर्ने, फुक्र्याउनेभन्दा पनि खबरदारी गर्ने समय हो त्यो चाहिँ’ उनी भन्छन्, ‘भोलिका दिनमा पनि खबरदारी गर्नुपर्छ । अझ सरकारमा भएका व्यक्तिहरू । सरकार भनेको जिम्मेवार निकाय हो ।’
ओलीको प्रशंसा गरेपछि सपुत सामाजिक सञ्जालमा आलोचित बनेका थिए । कामको कुरा गर्दा, सपुतले अभिनय गरेको फिल्म ‘सोल्टिनी’ अहिले हलमा चलिरहेको छ ।
प्रतिक्रिया