बन्दकर्ता माथि प्रहरिकाे बल प्रयाेग

महेन्द्रनगर

२०७८ फागुन १६ गते सोमबार

एमसीसी अनुमोदनको बिरोधमा उत्रिएका नेत्र बिक्रम चन्द ‘विप्लव’ निकट नेपाल कम्युनिस्ट पार्टीका कार्यकर्तामामाथि प्रहरीले महेन्द्रनगरमा लाठी चार्ज गरेको छ । प्रहरीको लाठी चार्जबाट २ जना घाइते भएका छन् ।

विप्लव निकट युवा संगठन कञ्चनपुरका उपाध्यक्ष दिपेन्द्र ऐरी र अखिल क्रान्तिकारी कञ्चनपुरका सचिव हरिष ऐरी घाइते भएको युवा संगठनका नेता मनमाेहन जाेशिले बताए । उनका अनुसार घाइतेहरुको महाकाली अस्पतालमा उपचार भइरहेको छ ।

शान्तिपूर्ण आन्दोलनमा प्रहरीले दमन गरेको उनले बताए । ‘विप्लव’ नेतृत्वको नेपाल कम्युनिष्ट पार्टीसहित ६ दल र दुई मोर्चाले आज नेपाल बन्द गरेका छन् ।

विप्लव नेतृत्वको नेकपा, मोहन वैद्य नेतृत्वको नेकपा (क्रान्तिकारी माओवादी), ऋषि कटेल नेतृत्वको नेकपा, आहुती नेतृत्वको वैज्ञानिक समाजवादी कम्युनिष्ट पार्टी नेपाल, कर्णजीत नेतृत्वको नेकपा माओवादी केन्द्र समाजवादी र सिपी गजुरेल नेतृत्वको देशभक्त जनगणतान्त्रिक मोर्चाले एमसिसी खारेजीको माग राखेका छन् ।