सरकारले लक्षित समूहका सबै जनसङ्ख्यालाई चैत मसान्तभित्र कोरोनाभाइरस (कोभिड–१९) विरुद्धको खोप लगाइसक्ने घोषणा गरेको थियो । तर, उक्त समयावधि सकिनु दुई दिन अघिसम्म १८ वर्षमाथिका ८३ प्रतिशत अर्थात् एक करोड ६४ लाख ६१ हजार ४५६ जनाले मात्र पूर्ण मात्राको खोप लगाएका छन् । सरकारले उक्त लक्षित समूहका एक करोड ९९ लाख २२ हजार १६४ जनालाई पूर्ण मात्रा खोप लगाउने घोषणा गरेको थियो ।
सरकारले सो लक्ष्य पूरा गर्न दुई दिनको अवधिमा लक्षित समूहका १७ प्रतिशत जनसङ्ख्या अर्थात् ३३ लाख ८६ हजार ७६७ जनालाई पूर्ण मात्रा खोप लगाइदिनुपर्ने हुन्छ । जबकि, हाम्रो संरचना, जनशक्ति र खोपप्रतिको आकर्षण लगायतका परिस्थिति विश्लेषण गर्दा दैनिक सरदर १७ लाख जनसङ्ख्यालाई खोप लगाउन असम्भव देखिन्छ ।
स्वास्थ्य तथा जनसङ्ख्या मन्त्रालयका उच्च अधिकारीहरू कोरोना विरुद्धको खोप प्राप्ति र खोप अभियान सफल पार्न कुनै कसर बाँकी नछाड्ने बताउँदै आए पनि पछिल्लो समय यो खोप लगाउन खोप केन्द्रसम्म पुग्नेको सङ्ख्या कम हुँदै गएको छ ।

स्वास्थ्य तथा जनसङ्ख्या मन्त्रालयका अनुसार, सोमबार मात्रै देशभर जम्मा १५ हजार ३३५ जनाले कोरोना विरुद्धको खोप लगाएका छन् । २७ चैत अर्थात् आइतबार २० हजार ८२८ जनाले खोप लगाएका छन् भने २५ चैतमा २६ हजार ४५ जनाले खोप लगाएका थिए ।

यस्तै, २४ चैतमा ५० हजार ९३ जना, २३ चैतमा ५६ हजार २२७ जना, २२ गते १७ हजार ७५५ जना र २१ चैतमा ६० हजार ७२ जनाले खोप लगाएका थिए ।
स्वास्थ्य तथा जनसङ्ख्या मन्त्रालयका प्रवक्ता डा. संगिता कौशल मिश्राले कोरोना महामारीको तेस्रो लहर कम हुँदै गएपछि दैनिक खोप लगाउन जानेको सङ्ख्यामा कमी आउन थालेको बताउँछिन् । ‘कतिपय मानिस सङ्क्रमण दर कम भएपछि खोप लगाउन गएनन् । तेस्रो लहरमा धेरै जना कोरोना सङ्क्रमित भए । यसरी सङ्क्रमित भएकाहरूमा तत्काल फेरि सङ्क्रमण हुँदैन भन्ने मानसिकताका कारण पनि खोप लगाउनेको सङ्ख्यामा कमी आएको हुनसक्छ,’ उनले भनिन् ।
केही दिन यता स्थानीय तहको चुनावी सरगर्मीका कारण पनि खोप केन्द्रमा पुग्नेको सङ्ख्यामा कमी आएको हुन सक्ने उनको भनाइ छ । उनले भनिन्, ‘कोरोनाविरुद्धको खोप लगाइदिने भनेको स्थानीय तहहरूले हो । पछिल्ला दिनहरूमा स्थानीय तहहरूमा चुनावी माहौल भएकाले पनि खोपमा भन्दा चुनावतिर धेरैको ध्यान पुगेको हुन सक्छ ।’