* नारायणकाजी श्रेष्ठ, उपप्रधान तथा परराष्ट्रमन्त्री
नेकपा माओवादी केन्द्रका वरिष्ठ उपाध्यक्ष एवं राष्ट्रिय सभा सदस्य नारायणकाजी श्रेष्ठ पाँचौँ पटक मन्त्री बनेका छन् । यसअघि उनी दुई पटक गृहमन्त्री, एकपटक भौतिक पूर्वाधार तथा यातायात र एकपटक पर्यटन मन्त्री बनेका थिए । 
गोरखाको जौबारीमा २०१६ सालमा जन्मेका श्रेष्ठले एम.ए.सम्मको अध्ययन गरेका छन् । मन्त्री श्रेष्ठ २०४३ सालमा निर्मल लामा नेतृत्वको नेकपा चौथो महाधिवेशनको केन्द्रीय सदस्य हुँदै कम्युनिस्ट राजनीतिमा सक्रिय भएका थिए । 

* रघुवीर महासेठ, उपप्रधान तथा भौतिक पूर्वाधार मन्त्री
नेकपा एमालेका प्रभावशाली नेता रघुवीर महासेठ  यसअघि उनी उपप्रधान र परराष्ट्र मन्त्री, भौतिक पूर्वाधार मन्त्री, सिंचाई मन्त्रीको भूमिकामा रहेका थिए । २०१८ सालमा धनुषामा जन्मिएका महासेठले सिभिल इन्जिनियरिङमा स्नातक तह सम्मको अध्ययन गरेका छन् ।  २०३३ सालमा नेकपा मालेको सदस्यता लिएर उनले राजनीति थालेका थिए । हालसम्म उनी धनुषा जिल्लाबाट ३ पटक प्रतिनिधि सभामा निर्वाचित भइसकेका छन् । 
* रवि लामिछाने, उपप्रधान तथा गृहमन्त्री 
पत्रकारिताबाट राजनीतिमा लागेका गृहमन्त्री लामिछानेसँग झन्डै डेढ वर्षको राजनीतिक अनुभव छ । राष्ट्रिय स्वतन्त्र पार्टीका सभापति समेत रहेका उनी अघिल्लो वर्ष ४२ दिन गृहमन्त्री बनेका थिए । २०३२ साल भदौ २८ गते भक्तपुरको नगरकोटमा जन्मिएका उनले पत्रकारितामा आई.ए. तहसम्मको अध्ययन गरेका छन् । 
२०७९ मा भएको प्रतिनिधि सभा निर्वाचनमा उनी चितवन २ बाट निर्वाचित भएका थिए । पछि नागरिकता विवादमा उनले सांसद र मन्त्री पद गुमाएका थिए । गत वैशाखमा भएको उपनिर्वाचनबाट पुन उनी विजयी भएका थिए । 
* वर्षमान पुन, अर्थमन्त्री 
रोल्पाको जङ्कोट गाविसमा २०२८ सालमा जन्मिएका अर्थमन्त्री वर्षमान पुनले स्नातक तह सम्मको अध्ययन गरेका छन् । यसअघि उनी २०६४ सालमा संविधान सभा सदस्य, २०६७ सालमा झलनाथ खनालको नेतृत्वको सरकारमा शान्ति तथा पुनर्निर्माण मन्त्री भएका थिए । त्यसपछि २०६८ सालमा डा.बाबुराम भट्टराईको नेतृत्वको सरकारमा अर्थमन्त्री रहेका थिए । यस्तै २०७४ सालमा केपी ओली नेतृत्वको सरकारमा ऊर्जा, जल तथा सिँचाइ मन्त्री भएका थिए । हाल उनी माओवादी केन्द्रको उपमहासचिव पदमा रहेका छन् । मन्त्री पुनले अमेरिका, रुस, चीन लगायत २८ मुलुकहरूको भ्रमण गरेका छन् । 
* भानुभक्त जोशी, संघीय मामिला तथा सामान्य प्रशासन मन्त्री 
नेकपा एकीकृत समाजवादीका नेता एवं संघीय मामिला तथा सामान्य प्रशासन मन्त्री भानुभक्त जोशी दोस्रो पटक मन्त्री बनेका हुन । यसअघि उनी २०६८ सालमा वन तथा भू–संरक्षण मन्त्री भएका थिए । २०३६ सालबाट विद्यार्थी राजनीतिक हुँदै अघि बढेका जोशी २०६४ सालमा संविधान सभा सदस्य भएका थिए । गत निर्वाचनमा उनी बझाङ १ बाट निर्वाचित भएका थिए । हाल उनी एकीकृत समाजवादीका स्थायी कमिटी सदस्य रहेका छन् । २०१६ सालमा जन्मिएका जोशीले स्नातकसम्मको अध्ययन गरेका छन् । 
* ज्वाला कुमारी साह, कृषि तथा पशुपक्षी मन्त्री
नेकपा एमालेकी सांसद समेत रहेकी ज्वालाकुमारी साह यसअघि पनि पटक पटक सांसद तथा मन्त्री भएकी थिइन । २०५४ सालमा माओवादी केन्द्रबाट राजनीति सुरु गरेकी उनी २०६४ सालमा संविधानसभा सदस्य, २०६७ सालमा भूमिसुधार राज्यमन्त्री, पर्यटन राज्यमन्त्री, २०७७ साल र २०७९ सालमा गरी २ पटक कृषि तथा पशुपक्षी विकास मन्त्री भएकी थिइन । उनी २०३८ सालमा बारा जितपुर सिमरामा जन्मिएकी थिइन । उनले बि.एड तहको अध्ययन गरेकी छिन् । 

* डोल प्रसाद अर्याल, श्रम तथा रोजगार मन्त्री
धादिङ जिल्लाको ज्वालामुखी नगरपालिका–२ स्थायी घर भएका डोलप्रसाद अर्यालको जन्म २०३१ साल भदौ ६ गते भएको थियो । उनको राजनीतिक अनुभव भने झन्डै १ वर्षको रहेको छ । २०७९ सालबाट राजनीति सुरु गरेका उनले पर्यटन र म्यानपावर क्षेत्रमा २० वर्षको अनुभव सम्हालेका छन् । अर्यालले जापान, अमेरिका, चीन, भारत, कोरिया, फिलिपिन्स, थाइल्याण्ड लगायतका देशको भ्रमण गरेका छन् । यसअघि उनी २२ दिन मन्त्री भएका थिए । 

* दामोदर भण्डारी, उद्योगमन्त्री 
एमालेबाट मन्त्री भएका दामोदर भण्डारी २०३९ साल कार्तिक २० बैतडीको पाटनमा जन्मिएका थिए । बि.ए. सम्मको अध्ययन गरेका भण्डारी यसअघि झन्डै २ महिना मन्त्री भएका थिए । उनले २०४६ सालदेखि एमालेको विद्यार्थी संगठन अनेरास्ववियूबाट राजनीति थालेका थिए । हाल उनी एमालेको सुदूरपश्चिम प्रदेश कमिटीको अध्यक्षको भूमिकामा पनि रहेका छन् । उनी यसअघि पनि एकपटक उद्योगमन्त्री भएका थिए । भण्डारीले भारत, चीन, कोरिया, जर्मनीको भ्रमण गरेका छन् । 

*पदम गिरी, कानुन न्याय तथा संसदीय मामिला मन्त्री
यसअघि स्वास्थ्य तथा जनसंख्या मन्त्री, एमाले प्रमुख सचेतक रहेका पदम गिरी अहिले कानुन, न्याय तथा संसदीय मामिला मन्त्री बनेका छन् । २०३३ सालमा पर्वत कुस्मामा जन्मिएका गिरीले एम.ए सम्मको अध्ययन गरेका छन् । 
उनी २०७४ सालको प्रतिनिधि सभा निर्वाचन र २०७९ सालको निर्वाचनमा पर्वतबाट निर्वाचित भएका थिए । उनले अमेरिका, बेलायत, स्वीट्जरल्याण्ड, फ्रान्स, कतार र भारतको भ्रमण गरेका छन् । 

* सुमना श्रेष्ठ, शिक्षा, विज्ञान तथा प्रविधि मन्त्री 
राष्ट्रिय स्वतन्त्र पार्टीको आदिवासी जनजाति कोटाबाट समानुपातिक सांसद बनेकी सुमना श्रेष्ठले शिक्षा मन्त्रालयको जिम्मेवारी पाएकी छिन् । काठमाडौँ महानगरपालिका वडा नम्बर २६ याकुपामा २०४१ साल असोज १५ गते जन्मिएकी उनले पोल्याण्डका नागरिक पावल लुकास स्काविन्स्कीसँग बिहे गरेकी छिन् । 
श्रेष्ठले व्यवस्थापनमा स्नातकोत्तर सम्मको अध्ययन, अमेरिकाको ब्रायन मावर कलेज र ह्याभरफोर्ड कलेजबाट अर्थशास्त्र र गणितमा स्नातक,  एमआईटी स्लोन स्कूल अफ म्यानेजमेण्टबाट बिजनेस एडमिनिष्ट्रेशनमा स्नातकोत्तर सम्मको अध्ययन गरेकी छिन् । उनीसँग झन्डै १ वर्ष हाराहारीको राजनीतिक अनुभव रहेको छ । 

* बलराम अधिकारी, भूमि व्यवस्था तथा सहकारी मन्त्री
२०३३ सालदेखि विद्यार्थी राजनीतिमा लागेका नेकपा एमालेका नेता बलराम अधिकारी २०७० सालमा संविधान सभा सदस्यमा र २०७९ सालमा प्रतिनिधि सभा सदस्यमा निर्वाचित भएका थिए । २०१७ सालमा कपिलवस्तुमा जन्मिएका अधिकारीले आई.ए तहको अध्ययन गरेका छन् । उनी पहिलोपटक मन्त्री पदमा नियुक्त भएका हुन । उनले विभिन्न ७ वटा देशको भ्रमण गरेका छन् । 

* भगवती चौधरी, महिला, बालबालिका तथा समाजकल्याण मन्त्री
नेकपा एमालेकी नेतृ भगवती चौधरी २०२८ सालमा औरवनी ३, सुनसरीमा जन्मिएकी थिइन् । उनले मानविकी संकायबाट समाजशास्त्रमा स्नातकोत्तर र व्यवस्थापन सङ्कायमा स्नातक सम्मको अध्ययन गरेकी छिन् । 
२०६४ सालमा संविधानसभा सदस्य, २०६७ सालमा वन तथा भू संरक्षण राज्य मन्त्री भएकी थिइन भने गत वर्ष झन्डै २ महिना महिला, बालबालिका तथा ज्येष्ठ नागरिक मन्त्री भएकी थिइन । 

* राजेन्द्र कुमार राई, खानेपानी मन्त्री
नेकपा एमालेका नेता एवं खानेपानी मन्त्री राजेन्द्र कुमार राई २०२१ सालमा धनकुटामा जन्मिएका थिए । २०३५ सालबाट राजनीति सुरु गरेका उनी २०७४ सालको निर्वाचनमा धनकुटाबाट विजयी भएका थिए । यसअघि अघिल्लो वर्ष उनी झण्डै २ महिना भूमि व्यवस्था मन्त्री भएका थिए । उनले विभिन्न १४ वटा देशको भ्रमण गरेका छन् । 

* रेखा शर्मा, सूचना तथा सञ्चार प्रविधि मन्त्री 
सूचना तथा सञ्चार प्रविधि मन्त्री रेखा शर्मा यसअघि पनि कांग्रेस, माओवादीको गठबन्धन सरकारमा सोही मन्त्रालयको जिम्मेवारीमा रहेकी थिइन् ।  दाङको घोराहीमा २०२६ सालमा जन्मेकी शर्माले २०४३ सालदेखि राजनीतिक क्षेत्रमा लागेकी हुन । 
माओवादी केन्द्रकी स्थायी कमिटी सदस्य शर्मा गत प्रतिनिधि सभा निर्वाचनमा  दाङ क्षेत्र नम्बर २ बाट विजयी भएकी थिइन । 

* हितबहादुर तामाङ, संस्कृति, पर्यटन तथा नागरिक उड्डयनमन्त्री  
पर्यटन तथा नागरिक उड्डयनमन्त्री हितबहादुर तामाङ दोस्रो पटक मन्त्री भएका हुन् । २०६६ सालमा झलनाथ खनाल प्रधानमन्त्री भएको उनी युवा तथा खेलकुद मन्त्री भएका थिए । 
नुवाकोटमा २०२० सालमा जन्मिएका तामाङ २०३६ सालमा अनेरास्ववियु छैटौँमा आबद्ध भएर राजनीतिमा लागेका थिए । 

* विराजभक्त श्रेष्ठ, युवा तथा खेलकुद मन्त्री 
नवनियुक्त युवा तथा खेलकुद मन्त्री विराजभक्त श्रेष्ठ पहिलो पटक मन्त्री भएका हुन । २०३८ सालमा काठमाडौँमा जन्मिएका श्रेष्ठले स्नातक तहसम्मको अध्ययन गरेका छन् । 
२०७४ सालको प्रदेशसभा निर्वाचनमा उनी तत्कालीन विवेकशील साझा पार्टीबाट बागमती प्रदेश सभामा समानुपातिक सांसद बनेका थिए । गत वर्ष प्रतिनिधि सभा निर्वाचनमा राष्ट्रिय स्वतन्त्र पार्टीको तर्फबाट काठमाडौँ क्षेत्र नं ८ बाट उनी निर्वाचित भएका थिए । 

* धनबहादुर बुढा
हालसम्म ३ पटक सांसद र १ पटक राज्यमन्त्री भएका मन्त्री धनबहादुर बुढा गत प्रतिनिधि सभा निर्वाचनमा डोल्पा बाट निर्वाचित भएका हुन् । त्यसअघि उनी २०७० सालमा संविधानसभा सदस्य र २०७४ सालमा प्रतिनिधि सभा सदस्य रहेका थिए । हाल नेकपा एकीकृत समाजवादीमा रहेका बुढा पर्यटन राज्यमन्त्री समेत बनेका थिए । 
२०३१ सालमा डोल्पामा जन्मिएका उनले आईएसम्मको अध्ययन गरेका छन् ।  उनले विभिन्न ७ वटा देशको भ्रमण गरेका छन् ।