शिक्षकहरूको पेशागत विकास तथा शैक्षिक क्षेत्रका समसामयिक विषयमा छलफल गर्ने उद्देश्यले सुदूरपश्चिममा प्रदेशस्तरीय शिक्षक सम्मेलन–२०८३ आयोजना हुने भएको छ ।
काठमाडौं विश्वविद्यालयको स्कुल अफ एजुकेसनअन्तर्गतको निरन्तर तथा व्यावसायिक शिक्षा केन्द्र र सुदूरपश्चिम विश्वविद्यालयको केन्द्रीय शिक्षा विभागको संयुक्त आयोजनामा शनिबार सुदूरपश्चिम विश्वविद्यालय, महेन्द्रनगरमा सम्मेलन आयोजना हुन लागेको हो ।
सम्मेलनको पूर्वसन्ध्यामा शुक्रबार महेन्द्रनगरस्थित सुदूरपश्चिम विश्वविद्यालयमा आयोजित पत्रकार सम्मेलनमा सम्मेलनका संयोजक डा। गम्भीर चन्दले शिक्षकहरूको पेशागत क्षमता विकास, शिक्षण–सिकाइका प्रभावकारी अभ्यास तथा शिक्षा क्षेत्रमा देखिएका चुनौती र सम्भावनाबारे विज्ञ, शिक्षक तथा शिक्षा क्षेत्रका सरोकारवालाबीच छलफल र अनुभव आदानप्रदान गर्ने उद्देश्यले सम्मेलन आयोजना गर्न लागिएको जानकारी दिनुभयो ।
उहाँका अनुसार सम्मेलनमा विभिन्न शैक्षिक संस्था तथा संघसंस्थाको सहकार्य र सहयोग रहनेछ । सम्मेलनमा २५ वटा कार्यपत्र प्रस्तुतिका साथै समूहगत छलफलसमेत आयोजना गरिनेछ । शिक्षा क्षेत्रमा भइरहेका नयाँ अभ्यास, अनुसन्धान तथा अनुभवलाई एकअर्कासँग जोड्दै शिक्षकको पेशागत विकासमा योगदान पु¥याउने विषयमा सम्मेलन केन्द्रित रहने आयोजकले जनाएको छ ।
सम्मेलनमा सुदूरपश्चिम प्रदेशका विभिन्न जिल्लाबाट बालविकास तहदेखि विश्वविद्यालय तहसम्मका शिक्षक तथा प्राध्यापकहरूको सहभागिता रहने बताइएको छ । विभिन्न तहमा अध्यापन गरिरहेका शिक्षकहरूलाई एउटै मञ्चमा ल्याएर अनुभव, ज्ञान र शिक्षण विधिबारे छलफल गर्ने भएकाले सम्मेलनलाई प्रदेशको शैक्षिक क्षेत्रका लागि संवादको महत्वपूर्ण अवसरका रूपमा लिइएको छ ।
आयोजकका अनुसार सम्मेलनले शिक्षकहरूको क्षमता अभिवृद्धिसँगै प्रदेशको समग्र शिक्षा प्रणालीमा देखिएका समस्या पहिचान गर्न तथा आगामी दिनमा शिक्षण–सिकाइलाई थप प्रभावकारी बनाउने उपायबारे साझा धारणा निर्माण गर्न सहयोग पुग्ने अपेक्षा गरिएको छ ।