नेकपा एकीकृत समाजवादीका अध्यक्ष माधवकुमार नेपालले संघमा तीन मन्त्री र प्रदेशमा एक मुख्यमन्त्री आफ्नो पार्टीले पाउनुपर्ने दावी गरेका छन् । शुक्रबार बिहान प्रधानमन्त्री पुष्पकमल दाहाल ‘प्रचण्ड’लाई बालुवाटारमा भेटेर अध्यक्ष नेपालले यस्तो दावी गरेका हुन् ।  ‘संघमा तीन मन्त्रालय र प्रदेशको एक मन्त्रालय दावी गर्नेगरी पार्टीमा कुरा भएको हो । सोहीअुनसार अध्यक्षले प्रधानमन्त्रीसँगको आजको भेटमा कुरा राख्नुभएको छ’, अध्यक्ष नेपाल निकट स्रोतले भन्यो, ‘त्यसमा प्रधानमन्त्रीले कसरी मिलाउन सकिन्छ म मिलाउने प्रयास गर्छु भन्ने जवाफ दिनुभएको छ ।’

प्रधानमन्त्री प्रचण्डले चैत ६ गते प्रतिनिधिसभाबाट विश्वासको मत प्राप्त गरेसँगै मन्त्रिमण्डललाई पूर्णता दिने तयारी गरेका छन् । त्यसका लागि प्रधानमन्त्रीले कांग्रेस सभापति शेरबहादुर देउवा, एकीकृत समाजवादीका अध्यक्ष नेपालसहित गठबन्धनमा रहेका नेताहरुसँग एक्लाएक्लै भेटेर मन्त्रालय भागबण्डा र प्रदेश मुख्यमन्त्रीका बारेमा छलफल गरिरहेका छन् । सत्तारुढ दलको शुक्रबार बस्ने बैठकमा प्रधानमन्त्री प्रचण्डले भागबण्डाको ठोस प्रस्ताव पेस गर्ने र त्यसपछि मन्त्रिमण्डल विस्तार गर्ने तयारी छ ।

प्रधानमन्त्री प्रचण्डसँग शुक्रबारको भेटमा चाँडो मन्त्रिमण्डल विस्तार गर्नेबारे कुराकानी भएको बताए ।  ‘अब चाँडो मन्त्रिमण्डल विस्तार गर्नुपर्छ भन्ने कुरा भयो’, नेता नेपालले प्रचण्डसँगको भेटवार्ताबारे भने, ‘आजै कांग्रेस सभापतिसँग पनि छलफल गरेर निर्णयमा पुग्छु भन्नुभएको छ ।’ अध्यक्ष नेपालले स्वभाविक रुपमा मुख्यमन्त्रीमा दावी रहने बताएका छन । 

‘दावी त रहन्छ नै तर कुन प्रदेशको मुख्यमन्त्री भन्ने प्रश्ट भैसकेको छैन’, अध्यक्ष नेपालको भनाइ छ । यसअघि एकीकृत समाजवादीले कोशी प्रदेशको मुख्यमन्त्री पाउनुपर्ने बताउदै आएको छ । पूर्वमुख्यमन्त्री समेत रहेका एकीकृत समाजवादीका नेता राजेन्द्र राईले कोशी प्रदेशको मुख्यमन्त्रीमा आफ्नो पार्टीले दावी गर्ने जनाएका थिए ।