कंचनपुरमा लागुऔषधकाे प्रयाेग बढ्दै, चार बर्षमा ८ सय ३८ पक्राउ ।

महेन्द्रनगर

२०८० साउन ०१ गते सोमबार

कञ्चनपुर जिल्लामा लागु औषधका घटनाहरूमा वर्षेनी वृद्धि भइरहेको छ । जिल्ला प्रहरी कार्यालय कञ्चनपुरले आइतबार आयाेजना गरेकाे पत्रकार भेटघाट कार्यक्रममा सार्वजनिक गरिएको विवरणले कञ्चनपुरमा लागु औषधको कारोबारले विकराल स्थिति सृजना गरेको पुष्टि गरेको छ ।

प्रहरी स्रोतका अनुसार, चालु आर्थिक वर्ष २०७९।०८० मा कञ्चनपुर जिल्लाभर २५५ जना पुरुष र १३ जना महिला नेपाली तथा १४ जना भारतीय गरी जम्मा २८२ जनालाई प्रहरीले पक्राउ गरेको छ ।

आर्थिक वर्ष २०७६।०७७ मा पुरुष ७७, महिला ३ र भारतीय नागरिक ७ जना गरी जम्मा ८७ जनालाई प्रहरीले लागु औषध मुद्दामा पक्राउ गरेको थियो । तर त्यसको अर्को वर्ष २०७७।०७८ मा उक्त सङ्ख्या झण्डै तेब्बरले वृद्धि भयो । सो आर्थिक बर्षमा पुरुष २१६, महिला ४ र भारतीय नागरिक १० जना गरी जम्मा २३० जनालाई प्रहरीले पक्राउ गरी मुद्दा चलायो । गत आर्थिक वर्ष २०७८।०७९ मा पुरुष २१८, महिला ८ र भारतीय नागरिक १३ जना गरी जम्मा २३९ जना पक्राउ गरिएको जिल्ला प्रहरी कार्यालय कञ्चनपुरले जनाएको छ ।

यसरी पक्राउ पर्नेमा अधिकांश युवावस्थाका व्यक्तिहरू छन् । उनीहरूले चरेस, खैरो हेरोइन तथा नाईट्राभेट लगायतका दर्जन बढी नामका लागु औषधहरूको कारोबार गर्ने गरेको पाइएको छ ।

#लागुऔषध