नगरिकताबाट बन्चित भए कंचनपुरका तीन पालिका, गृहलाई दोष देखाउदै पन्छिए सिडियो
पुनर्वास– कंचनपुरको तीन पालिकाका नागरिक दुई साता देखि नागरिकता प्राप्त गर्नबाट बन्चित भएका छन् । 
फागुन १ गते ईलाका प्रशासन कार्यालय त्रिभुवनबस्तीका कार्यालय प्रमुख डम्बर बहादुर खड्काको जिम्मेवारीको समयावधि सकिएपछि गृह मन्त्रालयले जिम्मेवारी थप नगरिदिदा कंचनपुरको पुनर्वास, बेलौरी र लालझाडीका नागरिक नागरिकता प्राप्त गर्नबाट बन्चित भएका हुन् ।

लामो समय देखि ईलाका  प्रशासन जस्तो कार्यालयमा दैनिक प्रवाह हुने सेवा पुर्ण रुपमा ठप्प हुँदा समेत वैकल्पिक व्यवस्था गर्न नसक्नु निकै लज्जास्पद भएको पुनर्वासका स्थानीय रामबहादुर तामाङले बताए ।

यस विषयमा  जिल्ला प्रशासन कार्यालय कंचनपुरका प्रमुख जिल्ला अधिकारी गोपाल कुमार अधिकारीसंग बुझ्दा प्रमुखको जिम्मेवारी पाएका खड्काको  समयावधि गृहले नबढाउदा समस्या आएको जानकारी दिए ।

जिल्लामा कर्मचारीको अभाव छ । गृहले समयावधि नबढाए अर्को हप्ता सम्म कर्मचारी पठाउने  सिडियो अधिकारीको भनाई छ । तर सिडियोको भनाई नागरिकको समस्या विपरित देखिएको छ । प्रशासन जस्तो निकायमै कर्मचारीका कारण सेवा पूर्ण रुपमा प्रभावित हुनु सिडियोको गैरजिम्मेवारी भएको स्थानीयहरुको  आरोप छ ।

 
जिम्मेवारी खोसिएपछि एक दिनका लागि जिल्ला प्रशासन कार्यालय कञ्चनपुरमा कार्यरत प्रशासकीय अधिकृत उद्धव सिँह कार्कीलाई त्रिभुवनबस्तीको जिम्मेवारीमा खटाईएपनि अर्को दिनबाट पूर्ण रुपमा सेवा ठप्प हुन गएको थियो ।

तर यता नागरिकताकै लागि प्रत्येक दिन कार्यालयमा पुग्ने चालिस जना भन्दा बढि व्यक्तिहरु सास्ती पाईरहेका छन् । यस विषयमा जनप्रतिनिधिहरुको चासो पनि कम भएका कारण सास्ती खेप्नु परेको सेवाग्राहीहरुको दुखेसो छ ।

विधुतको समस्या कायमै

इलाका प्रशासन कार्यालय त्रिभुवनबस्तीमा विधुतको समस्या कायमै रहेको छ । इलाका प्रशासन कार्यालयमा वैकल्पिक व्यवस्थापन नहुँदा अझै सेवाग्राहीले सास्ती पाइरहेका छन् ।
प्रशासन कार्यालयमा विगत केहि वर्ष अघि देखि विधुतको वैकल्पिक व्यवस्थापन हुन नसक्दा दुई नगरपालिका र एक गाउँपालिकाबाट आउने सेवाग्राहीहरूले सेवा लिन सास्ती खेप्नुपरेको छ ।
सबैभन्दा बढी भिडभाड हुने यो कार्यालयमा विधुतको वैकल्पिक व्यवस्थापन नहुनु निकै लज्जास्पद भएको स्थानीय स्वास्थ्यकर्मी रमेश मगरले बताएका छन् ।
 उनले यस विषयमा आफुले कार्यालयमा सोध्दा बजेट नहुँदा वैकल्पिक व्यवस्था गर्न नसकेको र पालिकाहरुमा सहयोगका लागि अनुरोध गरेको कुरा सुनाएको जानकारी दिए ।
यस समस्याका विषयमा तीनै पालिकाले बजेट विनियोजित गरिदिए बिधुतका कारण झेल्नुपर्ने समस्याको अन्त्य हुने देखिन्छ ।