कैलालीको अत्तरियामा विश्व मौसम विज्ञान दिवस विशेष कार्यक्रमको आयोजना गरिएको छ् । जल तथा मौसम विज्ञान विभाग, महाकाली बेसिन फिल्ड कार्यालय अत्तरिया कैलालीको आयोजना तथा मर्सिकोर नेपाल, एमरेड, अक्सफाम, यूनिसेफ, नेपाल राष्ट्रिय समाज कल्याण संघ (एनएनएसडब्ल्यूए), डीसीए, क्लाईमेट रेजिलेन्स अलाईन्स, स्वीस रि फाउण्डेशन,  पेसवान, प्रेक्टिकल एक्शन, बी ग्रुप तथा निड्स नेपालको साँझेदारीमा ‘विश्व हिमनदी, जल तथा मौसम दिवस–२०८१’ विशेष कार्यक्रम गरिएको हो ।
 जल तथा मौसम विज्ञान कार्यालय कोहलपुरका प्रमुख राम प्रसाद अवस्थीको अध्यक्षतामा सम्पन्न भएको कार्यक्रमका प्रमुख अतिथि सुदूरपश्चिम प्रदेश सरकारका आन्तरिक मामिला तथा कानुन मन्त्री हिरा सार्की रहनुभएको थियो । कार्यक्रममा बोल्दै उहाँले सबैको सहकार्यमा विपद्को जोखिमबाट जोगिन सकिने बताउनुभयो । उहाँले पछिल्लो समय विपद्को जोखिम बढ्दै गएकाले तीनै तहका सरकार र सम्बन्धित संघ संस्था बिच सहकार्य हुन आवश्यक रहेको बताउनुभयो । ‘हामी संग सहयोगी संस्थाहरु छन्, स्थानीय सरकार छ, प्रदेश सरकार छ र संघीय सरकार छ’ उहाँले भन्नुभयो, तीनै तहका सरकार नमिलीकन अहिले विपद्को काम गर्न अन्योल हुने अवस्था छ् । त्यसलाई अन्त्य गर्नु सबैको सहकार्य हुनुपर्छ ।’ उहाँले विपदमा काम गर्ने सबै संस्थाहरु मिलेर एकद्वार प्रणालीबाट काम गर्नुपर्ने तर्क गर्नुभयो । संघ–संघहरुलाई चलाउन विधेयक ल्याउने तयारी गरिएको भए पनि केन्द्रमा पनि ऐन बनाउने तयारी भइरहेकाले यता रोकिएको बताउनुभयो ।

 उहाँले केन्द्रमा जस्तै प्रदेशमा पनि प्रदेश विपद् प्राधिकरण बनाउने तयारी भइरहेको बताउनुभयो । कार्यक्रममा बोल्दै सुदूरपश्चिम प्रदेशको सामाजिक विकास समितिका सभापति धर्मराज पाठकले विपद्का जोखिमहरु बढ्दै गएका भए पनि अहिलेको समयमा हामीले जोखिममा कसरी अनुकूलित हुने भन्ने चुनौती रहेको बताउनुभयो । उहाँले सुदूरपश्चिममा ढुवान, कटान र पटानको बढी समस्या रहेको बताउनुभयो । जल तथा मौसम विज्ञान कार्यालय कोहलपुरका प्रमुख राम प्रसाद अवस्थीले मार्च २२ मा र मार्च २३ मा मौसम दिवस मनाइएको बताउनुभयो । उहाँले मार्च २१ मा पहिलो पटक हिमनदी दिवस पनि मनाइएकाले यसलाई ‘विशेष कार्यक्रम’ भनिएको बताउनुभयो । उहाँले कार्यक्रम जनचेतना दिने सागै सहकार्य र समन्वयन गर्ने उद्देश्यले आयोजना गरिएको बताउनुभयो । उहाँले मौसम दिवसको अवसरमा जलवायु परिवर्तनको कुरा बढी जोडका साथ उठिरहेको बताउनुभयो । महाकाली बेसिन फिल्ड कार्यालय अत्तरियाका प्रमुख सञ्जय कुमार शाहले दिवसकै अवसरमा सुदूरपश्चिमका जल तथा मौसम अवलोकनकर्ताको लागि पूर्व सूचना क्षमता अभिवृद्धि सम्बन्धी २ दिने तालिम पनि आयोजना गरिएको बताउनुभयो । उहाँले तालिममा नदी नालाका गेजरिडर (जल मापक) ३१ जना र वर्षा तथा मौसम मापन केन्द्रका ६४ मध्ये २८ जना सहभागी गराइएको बताउनुभयो । उहाँले सुदूरपश्चिममा रहेका जल मापक ३१ वटै केन्द्र र वर्षा तथा मौसम मापनका ६४ मध्ये २३ वटा अटोमेटिक भइसकेको बताउनुभयो । अटोमेटिक मापन केन्द्रबाट प्रत्येक १० मिनेटमा सूचना वेबसाइटमा प्रकाशित हुने गरेको उनले बताउनुभयो । क्षमता अभिवृद्धि तालिममा पुराना उपकरणमा काम गरिरहेका गेजरिडरलाई अहिलेको आधुनिक उपकरण कसरी काम गर्ने भन्ने जानकारी दिइएको उहाँले बताउनुभयो ।