देउवा पक्षको आग्रह आयोग द्वारा अस्वीकार, उमेदवारी मिति फेर बदल नहुने

महेन्द्रनगर

२०८२ माघ ०५ गते सोमबार

फागुन २१ गते हुने प्रतिनिधिसभा सदस्य निर्वाचन प्रत्यक्षतर्फ उम्मेदवारी मनोनयन मिति सार्न नेपाली कांग्रेस शेरबहादुर देउवा पक्षले गरेको आग्रहलाई निर्वाचन आयोगले अस्वीकार गरेको छ।
आयोगको कार्यतालिका अनुसार माघ ६ गते उम्मेदवार मनोनयन गर्नुपर्छ। उम्मेदवारी मनोनयन मिति सार्ने निर्णय नभएको आयोगका प्रवक्ता नारायण भट्टराईले प्रष्ट पारेका छन्।
‘माघ ६ गते प्रतिनिधिसभा सदस्य निर्वाचनका लागि प्रत्यक्षतर्फ उम्मेदवारी मनोयन गर्ने कार्यतालिका पहिले नै सार्वजनिक भइसकेको हो। यसमा पुनर्विचार हुने कुनै सम्भावना छैन’, भट्टराइले भने।
देउवा समूहका केन्द्रीय कार्यालयका मुख्यसचिव कृष्णप्रसाद पौडेलले आइतबार आयोगमा गएर प्रतिनिधिसभा सदस्य निर्वाचन प्रत्यक्षतर्फ उम्मेदवारी मनोनयनलगायतको कार्यतालिका स्थगन गर्न माग राखेर निवदन दर्ता गराएका थिए।
उक्त निवेदनका विषयमा आफूलाई जानकारी नभएको भट्टराईले बताए। ‘निवेदन कानुन शाखामा गएको हुन सक्छ तर यस विषयमा मलाई कुनै जानकारी छैन’, उनले भने।
निर्वाचन आयोगले नेपाली कांग्रेसको आधिकारिकता विवादमा विशेष महाधिवेशनबाट गगन थापाको नेतृत्वमा निर्वाचित केन्द्रीय कार्यसमितिलाई मान्यता दिएपछि देउवा पक्षधर नेताहरू आक्रोशित भएका छन। आयोगको उक्त निर्णयविरुद्ध देउवा पक्षले आइतबार सर्वोच्च अदालतमा रिट निवेदन दर्ता गराएको छ।
देउवा पक्षले आयोगमा उम्मेदवारी मनोननयनसहित निर्वाचन कार्यातालिका सार्न आग्रह गर्दै निवेदन दिएपछि निर्वाचन सर्ने हो कि भन्ने आशंका गरिएको थियो तर उक्त आशंकामा सत्यता नभएको आयोगले प्रस्ट पारेको छ।
प्रधानमन्त्री सुशीला काकीसँग आइतबार नै आयोगका पदाधिकारीहरूले भेट गरेका छन्। उक्त भेट निर्वाचन आचारसंहिता कार्यान्वयन गर्ने विषयमा केन्द्रित भएको आयोगका पदाधिकारीले जनाएका छन्।