अस्थाई प्रहरी पाेष्ट हस्तान्तरण ।

मसुरिया

२०७८ चैत ०१ गते मङ्गलबार

घनश्याम पाैडेल -
कैलाली, गौरीगंगा नगरपालिका वडा नं ९ मसुरिया बजारमा प्रहरी पोष्ट हस्तान्तरण गरिएको छ। वडा नं ९ कार्यालयको सहयोगमा मसुरिया बजार व्यवस्थापन समितिको समन्वयमा पोस्ट निर्माण भएको हो।
मुख्य बजारमा स्थापना गरिएको प्रहरी पोष्टको कैलालीका प्रहरी नायब उपरीक्षक वेद प्रकाश जोशीले उद्घाटन गरेका थिए । वडा अध्यक्ष हरि प्रसाद तिवारी र मसुरिया बजार व्यवस्थापन समितिका अध्यक्ष हरि प्रसाद जोशीले उपरिक्षक जोशीलाई ताला चाबी सहित प्रहरी पोष्ट हस्तान्तरण गरेका छन् ।
कैलालीमा लागुपदार्थको कारोबार प्रयोगले सुरक्षा चुनौतीपुर्ण बन्दै गएको र घर-परिवारबाट आफ्ना किशोरावस्था र युवा छोराछोरी माथि निगरानी नगर्दासम्म समाजमा शान्ति सुरक्षा कायम गर्न चुनौतीपुर्ण भएको प्रहरी उपरीक्षक वेद प्रकाश जोशीले बताएका छन् ।
मसुरिया बजारमा विगत केहि समय यता लुटपाट चोरी र लागुपदार्थको कारोबार व्यापक रूपमा फैलिएको भन्दै स्थानीयहरूले बजार क्षेत्रमा शान्ति सुरक्षा कायम गर्न चौबिसै घण्टा प्रहरीको उपस्थिति हुने गरि पोष्ट माग गरेका थिए ।
स्थानीय बासिन्दाको माग अनुसार बजारमा सुरक्षा चुनौतीपुर्ण बन्दै गएको आफुहरुले पनि महसुस गरेर सहयोग उपलब्ध गराएको वडा अध्यक्ष तिवारीले बताएका छन् ।
नगरपालिकाबाट आस्वासन मात्र प्राप्त हुँदा बजारका व्यवसायीहरुको मागलाई सम्बोधन गर्दै वडा नं ९ को कार्यालयको सहयोगमा पोस्ट निर्माण भएको मसुरिया बजार व्यवस्थापन समितिका अध्यक्ष हरि प्रसाद जोशीले बताए ।