कक्षा ९ मा अध्ययनरत किशाेरिलाइ ४ महिनादेखि पटक पटक बलात्कार आराेपमा ३जना पक्राउ ।

महेन्द्रनगर

२०७९ मङि्सर २५ गते आइतबार

४ महिनादेखि पटक–पटक एक जना किशाेरिलाइ बलात्कार गरी गर्भ राखेको आरोपमा प्रहरीले तीन जनालाई पक्राउ गरेको छ।

बेलौरी नगरपालिका–२ भइसोरीकी १७ वर्षीया किशोरीलाई जबर्जस्ती करणी गरेको आरोपमा सोही वडाका तीन जना पक्राउ परेका हुन्।

आइतबार बिहान किशोरी र परिवारका सदस्यको जाहेरीका आधारमा बेलौरी नगरपालिका–२ भइसोरीकै २० वर्षीय दीपक बोट, ३७ वर्षीय साधुराम राना र ३३ वर्षीय हरिशंकर रानालाई पक्राउ गरिएको इलाका प्रहरी कार्यालयका प्रहरी निरीक्षक दानसिंह भण्डारीले बताए।

‘उनीहरुलाई पीडित किशोरी र परिवारका सदस्यको जाहेरी र बयानका आधारमा घरैबाट पक्राउ गरिएको हो,’ प्रहरी निरीक्षक भण्डारीले भने।

पेटमा गर्भ रहेको शंका लागेपछि परिवारले सुरुमा पीडितसँग सोधपुछ गरेको थियो। उनले नाम खुलाएपछि आइतबार बिहानै प्रहरीमा जाहेरी दिएका थिए।

स्वास्थ्य परीक्षणबाट किशोरीको पेटमा बच्चा रहेको खुलेको प्रहरी निरीक्षक भण्डारीले बताए।

परिवारको जाहेरीपछि सेती प्रादेशिक अस्पतालमा किशोरीको स्वास्थ्य परीक्षण गरिएको थियो।

‘किशोरीको पेटमा १८ हप्ताको बच्चा रहेको मेडिकल रिर्पोट आएको छ,’ प्रहरी निरीक्षक भण्डारीले भने।

पीडित किशोरी गाउँकै एक सामुदायिक विद्यालयमा कक्षा ९ मा अध्ययनरत थिइन्। पक्राउ परेकासहित थप केही अपरिचित व्यक्तिहरूले समेत किशोरीलाई पटक पटक जबर्जस्ती करणी गर्ने गरेको पीडित परिवारले जाहेरीमा उल्लेख गरेको प्रहरी निरीक्षक भण्डारीको भनाई छ।

किशोरी मानसिक रुपमा बिछिप्त रहेको र मनोपरामर्श दिइरहेको प्रहरीले जनाएको छ।